भक्तपुरको लोकन्थलीमा पानी बोकेको ट्याङ्करले किच्दा १७ महिना नाबालकको निधन भएको छ ।
आज बिहान ९:२० बजे आसपासको समयमा भक्तपुरको मध्यपुर ठिमी नगरपालिका वडा नं. १ लोकन्थली त्रिपुरासुन्दरी ग्रिल उद्योग अगाडी पानी झार्दै गरेको बा ५ ख ७८१७ नं. को निशान गाडीमुनि छिरेका एक बालकको ट्याङ्कर अगाडि सर्दा किचेर निधन भएको हो ।
मृतक बालक सिन्धुपाल्चोक त्रिपुरासुन्दरी गाँउपालिका वडा नं. ५ घर भई हाल लोकन्थली बस्ने केशवलाल श्रेष्ठको १७ महिनाको छोरा सलिन श्रेष्ठ रहेको भक्तपुर प्रहरी प्रवक्ता डिएसपी राजु पाण्डेले बताए ।
गाडीले किच्दा गम्भिर घाईते भई उपचारको लागि समिट अस्पताल लोकन्थली लगिएकोमा उपचारकै क्रममा बिहान १०:१८ बजे चिकित्सकले मृत घोषणा गरेको डिएसपी पाण्डेले बताए ।
प्रहरीले सवारी साधन र चालक सिन्धुपाल्चोक मेलम्ची गाँउपालिका वडा नं. ३ घर भई हाल काठमाण्डौ मुलपानी बस्ने वर्ष २३ को आकाश भुजेललाई नियन्त्रणमा लिएको छ ।