काठमाडौं महानगरपालिकाका मेयर बालेन शाहले डेंगीका बिरामीले आवश्यक पर्दा १०२ मा फोन गरेर निःशुल्क एम्बुलेन्स सेवा लिन सक्ने बताए ।
मेयर शाहले डेङ्गु फैलिरहेको अवस्थामा त्यसको रोकथाम र नियन्त्रणका लागि अत्याधिक सचेतना र क्रियाशीलताको आवश्यकता छ र त्यसको लागि महानगरपालिकाले आवश्यक कदम उठाएको बताएका छन् ।
उनले डेङ्गु संक्रमितहरुका लागि आजबाट २४ घण्टे हटलाइन सुरु गरेको सामाजिक सञ्जाल फेसबुक मार्फत जानकारी दिएका छन् ।
उनले संक्रमित भए वा भएको शंका लागेमा ११८० मा कल गरेर स्वास्थ्यकर्मीहरुबाट नै परामर्श पाउन सक्ने व्यवस्था पनि गरेका छन् । यो सँगै डेङ्गु विरुद्धमा टोल टोल वा सामूदायीक रुपमा नै सक्रिय भएर लाग्न मेयर बालेनले नगरबासिहरुलाई अपिल समेत गरेका छन् ।
मेयर शाहले पहिलेदेखि भइरहेका रोकथामका कार्यक्रमहरुलाई थप विस्तार गर्दै नयाँ कार्यक्रमहरु पनि ल्याएर स्रोत तथा जनशक्तिको अधिकतम प्रयोग गर्ने पनि बताएका छन् ।
