बलिउड बक्सअफिसमा पछिल्ला दिनमा फिल्महरु फ्लप हुने क्रम जारी छ । ‘लाल सिंह चड्ढा’ देखि लिएर ‘रक्षाबंधन’ र ‘लाइगर’ सम्म आइपुग्दै सबै फिल्म फ्लप भइसकेका छन् ।
यसले निर्माता मात्र होइन, हल सञ्चालक पनि ठूलो घाटामा छन् । यहीकारण आगामी सेप्टेम्बर ९ बाट रिलिज हुने रणवीर कपूर र आलिया भट्ट स्टारर फिल्म ‘ब्रह्मास्त्र’ हेर्न चाहने दर्शकका लागि हल सञ्चालकले ७५ रुपैंयाँमै टिकट उपलब्ध गराउने भएका छन् ।
मल्टीप्लेक्स एसोसिएसन अफ इण्डिया (एमएआई) र देशभरका थिएटरले १६ सेप्टेम्बरको राष्ट्रिय सिनेमा दिवसको अवसर पारेर ७५ रुपैंयाँमा नै टिकट उपलब्ध गराउने निर्णय गरेका छन् । १६ सेप्टेम्बरमा ४ हजार थिएटर यो राष्ट्रिय सिनेमा दिवसको हिस्सा बन्दैछन् ।
यो दिवस कोरोना महामारीपछि थिएटर खुलेको अवसर पारेर धन्यवाद दिनका लागि मनाइँदैछ ।
रजामौलीको साथ
चेन्नईमा भर्खरैको पत्रकार सम्मेलनमा, आरआरआर र बाहुबलीका कारण प्रसिद्धिमा आएका निर्देशक एसएस राजामौलीले आगामी फिल्म ब्रह्मास्त्रले बिश्वभर तहल्का पिट्ने ठोकुवा गरे । उनले ‘अस्त्र’ को कथा बताउने व्यावसायिक तरिका आफुलाई मन परेको बताएका हुन् ।
ब्रह्मास्त्रमा अयान मुखर्जीको कामको प्रशंशा गर्दै उनले भने , “अयानले हामीले पहिले कहिल्यै नदेखेको संसार सिर्जना गर्ने सपना देखेका थिए – हामीले हाम्रो इतिहास, हाम्रा पुराणहरूबाट सिकेका अस्त्रहरूको भव्य संसार।” उनले थपे, “बालबालिकाको रूपमा, हामीले यी अस्त्रहरूको बारेमा सुन्यौं तर तिनीहरूको वैभव कहिल्यै देखेका छैनौं।”