सुपर डान्सर नेपालको ग्राण्ड प्रिमियरमा चर्चित भारतीय अभिनेता गोबिन्दा आहुजा बिशेष अतिथिको रुपमा देखिने भएका छन् ।
उनी संगै उनको श्रीमती सुनिता समेत शो मा देखिनेछिन् । सुनिताका कारण गोबिन्दालाई नेपालको ज्वाई समेत भनिने गरेको छ । गोबिन्दा आफ्नो फरक शैली अनि नृत्यकलाका कारण परिचित छन् ।
यसै बीच सुपर डान्सर नेपालले ”मिट एण्ड ग्रिट विथ गोबिन्दा” कार्यक्रमको आयोजना गरेको छ । राजधानीमा आइतबार आयोजित उक्त कार्यक्रममा सुपर डान्सर नेपालको अहिलेसम्मको प्रगति अनि शोलाई अझै उत्कृष्ट बनाउन के कसो गर्न सकिन्छ भन्ने बारे समेत छलफल भएको अयोजक संस्था एडी रिलिजले जानकारी दिएको छ।
गोबिन्दा दम्पतीले समेत आफु यो शोलाई लिएर उत्साहित रहेको र आगामी दिनमा समेत यस्ता उत्कृष्ट नेपाली शोमा आफुहरुको उपस्थिती रहने कुरामा समेत आफुहरु प्रतिबद्ध रहेको जनाए। नेपाली चेली र ज्वाईको उपमा पाउदा आफुहरुलाई गर्व हुने साथै ज्वाई र चेलीलाई माइतीले सम्झिएर निम्ता दिए आफुहरु पक्कै आउने समेत उनहरुले बताए।
सुपर डान्सर नेपालको यसै हप्ता प्रशारण हुने ग्राण्ड प्रिमियर एपिसोडका लागि गोबिन्दा र सुनिता यतिबेला नेपालमा छन्, शो को शुटिंग पश्चात उनीहरु भारत फर्किने छन् ।
मङ्सिर दोश्रो हप्ता देशले पहिलो सुपर डान्सर नेपाल प्राप्त गर्ने छ। कान्तिपुर टेलिभिजन एचडी अनि ओएसआर रियालिटी युट्युब ,मार्फत यो शो हरेक हप्ता बिहीबार अनि शुक्रबार प्रसारण भईरहेको छ।