नेकपा (माओवादी केन्द्र)का अध्यक्ष पुष्पकमल दाहाल प्रचण्डले नागरिकता विधेयकलाई राष्ट्रघाति भन्नु गलत हुने बताएका छन् । उनले नागरिकता विधेयकलाई गलत ढंग र उद्धेश्यले प्रचार गरिएको बताए ।
गृह जिल्ला चितवन पुगेका प्रचण्ड भरतपुर विमानस्थलले आमाबुवा नेपाली नै भएर पनि छोराछोरीहरुले नागरिकता नपाएर अवसरबाट बञ्चित हुने स्थितीलाई अन्त्य गर्न नागरिकता विधेयक ल्याइएको उल्लेख गरे ।
उनले भने, “आमावुबा दुबै नेपालका नागरिक भएका छोराछोरीले नागरिकता पाउने मात्रै हो, अहिलेको विधेयकको । आमाबुवा पहिले नेपाली छन् । उनका छोराछोरीले नागरिकता नपाएर झण्डै ६–७ लाख मान्छेहरु सबै अवसरबाट बञ्चित हुने स्थिति भयो । त्यो स्थितिको अन्त्य गर्ने विधेयक हो । त्यसकारणले राष्ट्रघाती भन्नु पाखण्ड बाहेक केही हुँदैन् ।”
अध्यक्ष प्रचण्डले केपी ओली प्रधानमन्त्री हुँदा अध्यादेशमा रोकिएको यहि विधेयक रहेको जिकिर गरे । विधेयक संसदमा अहिले ल्याउँदा राष्ट्रघाती भन्नु बेइमानी रहेको उनको भनाई छ ।
उनले थपे, “एउटा त यो त्यही विधेयक हो केपी ओली पनि प्रधानमन्त्री हुँदा अध्यादेशमा रोकिएको थियो । यही विधेयक । त्यसकारण पनि, जसले यही विधेयक अध्यादेशको रुपमा पोहोर साल लगेका थिए, तिनिहरुले यहि विधेयक संसदमा ल्याउँदा राष्ट्रघाती भन्नु भन्दा बेइमानी अनैकिता अरु केही हुनै सक्दैन् ।”
उनले राज्य व्यवस्था समितिबाट पारित भएको वर्षे वैवाहिक अङ्कीकृतको प्रस्ताव सदनमा लैजाऔं भन्दा नमान्ने केपी ओली र एमाले गुट नै रहेको आरोप लगाए ।
यसैबीच, प्रचण्डले चितवनको माडी नगरपालिका अन्तर्गत बरुवाबजार भैरवपुर पर्साचोक बैदार चिन्द्रेनी अजिंगरे सहिदपुर गंगटे सडक शिलान्यास गरेका छन् । त्यस्तै माडी नगरपालिका हुलाकी सडक अन्तर्गत पर्ने रतनी खोला पुलको उद्घाटन र माडी ठोरी सडक खण्डको स्तरन्नोतीको शिलन्याश गरेका छन् ।
