२०७४ सालको प्रतिनिधि सभा निर्वाचनमा दोलखाबाट एमालेका उम्मेदवार पार्वत गुरुङ सर्वाधिक मतान्तरका साथ विजयी भएका थिए । केही समय सञ्चार मन्त्री समेत भएका गुरुङ ३०,६४४ मतान्तरका साथ विजयी भएका हुन् । उनले ५५,४५७ मत ल्याउँदा निकटतम प्रतिस्पर्धी नेपाली कांग्रेसका रुद्र बहादुर खड्काले जम्मा २४,८१३ मत पाएका थिए । प्रतिनिधि सभा निर्वाचनको लागि दोलखा जिल्लामा एउटा मात्र निर्वाचन क्षेत्र रहेको छ ।
पाँच वर्षपछि हुन लागेको सङ्घीय निर्वाचनमा गुरुङको लागि सहज छैन दोलखा । दुई नगरपालिका सहित नौ वटा स्थानीय तह रहेको दोलखा जिल्लामा रहेका वडाको सङ्ख्या ७४ छ । यस जिल्लामा निर्वाचित हुने जनप्रतिनिधिको सङ्ख्या ३८८ भएता पनि एक वडामा दलित महिला सदस्यमा मनोनयन नै नपर्दा ३८७ जना निर्वाचित हुन पुगे । कूल जनप्रतिनिधि निर्वाचित गर्नेमा एमाले नै पहिलो दल भएता पनि अघिल्लो स्थानीय निर्वाचनमा ४३ वडा जितेको एमाले यस पटक भने झन्डै आधा अर्थात् २४ वटामा खुम्चिन पुगेको छ ।
भर्खरै सम्पन्न भएको स्थानीय तह निर्वाचनमा धेरै जिल्लाहरूमा सत्ता गठबन्धनका दलहरूले आपसी सहमति गरेर चुनावमा सहभागी भएता पनि यस जिल्लामा भने सत्ता गठबन्धनका दलहरू वडाध्यक्ष पदमा एक आपसमै चुनावी प्रतिस्पर्धा गरेका थिए ।
२०७४ मा ११ वडा जितेको माओवादीले अहिले झन्डै दोब्बर अर्थात् २३ वडाध्यक्ष जित्न सफल भयो । नेपाली कांग्रेसले अघिल्लो पटक २० वडा जितेकोमा यस पटक २५ वडा जित्न सफल भयो ।
वामपन्थीको पकड रहेको दोलखामा ०५१ को मध्यावधि निर्वाचनमा कांग्रेसका भीमबहादुर तामाङ बाहेक अरूले जित हासिल गर्न सकेका छैनन्। ०६४ को पहिलो संविधानसभा सदस्य निर्वाचनमा दुवै क्षेत्र माओवादीले जितेको थियो। दोस्रो संविधानसभामा गुरुङ नै निर्वाचित भएका हुन् । त्यसबाहेक स्थानीय तथा प्रतिनिधिसभा निर्वाचनमा एमाले हाबी हुँदै आएको छ ।
तर आउँदै गरेको सङ्घीय चुनावमा भने एमालेलाई यस क्षेत्रमा चुनाव जित्न हम्मे हम्मे हुने देखिन्छ । २०७४ मा माओवादी र एमालेको गठबन्धन भएता पनि अहिले पाँच दलीय गठबन्धन एकातिर र एमाले अर्कोतिर हुने भएकाले पनि एमालेलाई सकस हुने देखिएको छ ।
वैशाख ३० गते सम्पन्न भएको स्थानीय चुनावमा सबै वडामा उम्मेदवारी दिएको एमालेले ३९,०५० मत पाउँदा ६१ वडामा उम्मेदवारी दिएको कांग्रेसले ३३,४३९ र ४० वडामा उम्मेदवारी दिएको माओवादी केन्द्रले १७,३७५ मत पायो । त्यस्तै गरी २० वडामा उम्मेदवारी दिएको नेकपा एसले ३,१५१ मत पाउँदा जसपाले २०९ मत पाएको छ ।
गठबन्धनलाई एकातिर र एमालेलाई अर्कोतिर तौलिने हो भने वडाध्यक्षको मतमा गठबन्धनले ५४,१७४ मत पाउँदा एमालेको मत ३९,०५० मात्र छ ।