प्रेस काउन्सिल नेपालले भ्रमपूर्ण विज्ञापन तयार पारेको भन्दै कडा कदम उठाएपछि एक रक्सी कम्पनीले विज्ञापन नै फेरेको छ । एक भोड्का कम्पनीले नेपालमा भेटियो सेतो बाघ भन्दै समाचारको शैलीमा भ्रमपूर्ण विज्ञापन दिएको थियो ।
त्यो विज्ञापन छापेलगत्तै काउन्सिले सम्बन्धित मन्त्रालय, विभाग र कम्पनीमाथि प्रश्न सोध्दै सात दिनभित्र परिवर्तन नगरे कारवाही गर्ने चेतावनी सहितको पत्र पठाएको थियो ।
विज्ञापन छाप्ने मिडिया कम्पनी कान्तिपुर र नयाँ पत्रिका दैनिकलाई समेत चेतावनीयुक्त पत्र पठाएपछि अहिले फरक शैलीको विज्ञापन छापिएको छ । नेपालमा रक्सीको विज्ञापन मिडियामा छाप्न नपाइने भएतापनि सञ्चारमाध्यमहरूले कानुनलाई वेवास्ता गर्दै ठूलो रकम लिएर रक्सीको विज्ञापन छाप्दै आइरहेका छन् ।
काउन्सिल अध्यक्ष बालकृष्ण बस्नेतले आचारसंहिता पालनामा अब्बल बन्नुपर्ने मिडियाले भ्रमपूर्ण सन्देश दिएको भन्दै त्यस्ता गल्ती नदोहोर्याउन ती मिडियाका प्रधानसम्पादकलाई पत्र समेत पठाएको बुझिएको छ ।
अध्यक्ष बस्नेतले सुदुरपश्चिमको एक पत्रकार अन्तरक्रिया कार्यक्रममा कतिपय मिडियाले विज्ञापनलाई समाचार जस्तै बनाएर दिन थालेको र त्यसले पत्रकारिताको विश्वसनीयता घट्दै गइरहेको बताएका थिए ।
त्यतिमात्र होइन, काउन्सिलले कान्तिपुरलाई चेतावनीयुक्त पत्र लेख्दै आगामी दिनमा पाठकलाई भ्रम उत्पन्न नहुने गरी समाचार, लेख, विचार र प्रायोजित सामाग्री नदिन सचेत समेत गराएको छ ।
काउन्सिलले पछिल्लो समयमा ठूला भनिएका मिडियालाई समेत आचारसंहिता उल्लंघन गरेका घट्नामा तत्काल पत्र काट्ने, सचेत गराउने, क्षमायाचना गराउनेलगायतका कारवाही गरिरहेको छ । हिजो मात्रै प्रेस चौतारी अध्यक्ष गणेश बस्नेतले सञ्चालन गर्ने जनताटाइम्स डटकमलाई २४ घण्टे पत्र काटेको थियो ।
काठमाडौं महानगरपालिकाका प्रमुख बालेन शाह पनि केही दिन अगाडि महानगरको विषयमा हिमालयन टेलिभिजन र नेपाल समाचारपत्रले भ्रमणपूर्ण समाचार छापेको भन्दै काउन्सिलमा उजुरी दिएका थिए । मेयर शाहको उजुरीको विषयमा पनि काउन्सिलले कारवाही अगाडि बढाएको बुझिएको छ ।
तीन महिना यता नयाँ अनलाइन दर्ता अघि आचारसंहिता अभिमुखिकरण कक्षा अनिवार्य रुपमा लिनुपर्ने व्यवस्थालाई समेत काउन्सिलले अघि बढाएको छ ।
