बिभिन्न राजावादी संघसंस्थाहरूले आज पूर्वराजा ज्ञानेद्र शाहको ७६ औ जन्मोत्सवको उपलक्ष्यमा काठमाडौंमा शुभकामना र्याली सहित प्रदर्शन गरेका छन् ।
नेपालका लागि नेपाली पार्टी, शाही युवाशक्ति नेपाल, स्वतन्त्र राष्ट्रवादीहरू र नेपालमा राजसंस्था चाहने स्वतन्त्र अभियान्ताहरूले आज काठमाडौंमा शुभकामना र्याली सहित प्रदर्शन गरेका छन् ।
भृकुटीमण्डपमा जम्मा भएकाहरूले र्यालीसहित नारायणहिटी पुगेको थिए । र्यालीमा सहभागीहरुले राजाको पक्षमा नारा लगाएका थिए । पूर्व राजा ज्ञानेन्द्र शाह भने हाल आफ्नो निजी भ्रमणको शिलशिलामा थाइल्याण्डमा रहेका छन् ।
वि.सं. २००४ साल असार २३ असार जन्मेका ज्ञानेन्द्र शाह नेपालको इतिहासमा दुई पटक राजा हुने पहिला व्यक्ति र नेपालका अन्तिम शाहवंशीय राजा हुन्। उनी परिस्थितिले दुई पटक नेपालका राजा भए तर नियतिले दुवैपटक दिल्ली सम्झौताले बाहिरिनु परेको थियो।
वि.सं २००७ मा उनका हजुरबुवा त्रिभुवन र बुवा महेन्द्रले देश छाडेर भारतमा शरण लिन गएपछि राणा शासकहरूले उनलाई राजा बनाएका थिए। पछि राजा वीरेन्द्रको वंश विनाशपछि उनी पुनः नेपालका राजा भएका थिए।
दरवार हत्याकाण्डमा राजा ज्ञानेन्द्रको परिवारका भने कसैलाई पनि केही नभएको, लगायतका कारणहरूले गर्दा दरबार हत्याकाण्डमा पनि उनैको हात रहेको केही मानिसहरूले आशंका व्यक्त गरेका छन् तर पनि स्वतन्त्र र वैज्ञानिक तथ्यबाट यसको पुष्टि हुन अझै सकेको छैन।
राजा महेन्द्रका माहिला छोरा ज्ञानेन्द्र राज परिवारको परम्परा अनुसार राजा हुने रोलक्रममा थिएनन्। वि.सं. २०५८ जेठ १९ गते नारायणहिटी दरवारभित्र भएको नरसंहारमा राजा वीरेन्द्रलगायत तत्कालीन राज परिवारका अधिकांश सदस्यको हत्या भएपछि राजा वीरेन्द्रका भाइ ज्ञानेन्द्र राजा भएका थिए।
प्रजातान्त्रिक शासन व्यवस्थाको माग गर्दै एक भएका सात राजनीतिक दलले वि.सं. २०६२/०६३ मा लोकतान्त्रिक आन्दोलन मार्फत प्रजातान्त्रिक शासन व्यवस्था पुनर्स्थापना गर्दै राजतन्त्रको अन्त्य गरी गणतन्त्रको घोषणा गरेपछि उनी नेपालको अन्तिम राजा बन्न पुगेका हुन्।
गणतन्त्रको घोषणापछि उनी बालाजु माथि नागार्जुन जंगल भित्र रहेको दरवारमा बस्दै आएका छन् भने उनका पुस्ताले निवासका रूपमा प्रयोग गरेको नारायणहिटीलाई नेपाल सरकारले सङ्ग्रहालय घोषणा गरेको छ।
थप तस्विरहरू