भारतबाट नेपालतर्फ आउने क्रममा तुइन चुँडिदा दार्चुलाको ब्यास गाउँपालिका–२, छुम्लिङमा एक १८ वर्षीय युवक बेपत्ता भएका छन् ।
दार्चुलाका प्रमुख जिल्ला अधिकारी दीर्घराज उपाध्यायका अनुसार सचिन बुढाथोकी नाम गरेका युवक तुइनबाट महाकाली नदीमा खसेर बेपत्ता भएका हुन् । बुढाथोकी यही वर्ष एसईई परीक्षा दिएर बसेका विद्यार्थी हुन् ।
स्थानीयबासिन्दाका अनुसार अहिले युवक बेपत्ता भएको स्थान गत वर्ष भारतीय पक्षले तुइन काटिदिँदा जयसिंह धामी बेपत्ता भएको ठाउँ नजिकै पर्छ । दार्चुलाका सीमा क्षेत्रका बासिन्दा किनमेलका लागि भारतीय बजार जाने गर्छन् । सीमा पार गर्नका लागि पक्की पुल नभएका कारण तुइन चढ्नुपर्ने बाध्यता छ ।
उनको खोजीका लागि नेपाल प्रहरी र सशस्त्र प्रहरी बलको टोली परिचालन गरिएको प्रजिअ उपाध्यायले बताए । उनले भने, ‘भारतीय सशस्त्र सीमा बल (एसएसबी) सँग पनि खोजीका लागि सहकार्य गरिरहेका छौं ।’
यसबीच, गृहमन्त्री बालकृष्ण खाणले तुइनबाट खसेर बेपत्ता बुढाथोकीको खोजी कार्य तीब्र बनाउन सम्बन्धित निकायलाई निर्देशन दिएका छन् ।
गृहमन्त्री खाणले दार्चुलाका प्रमुख जिल्ला अधिकारी दीर्घराज उपाध्याय, सशस्त्र प्रहरी बल सुदूरपश्चिम प्रदेश प्रमुख सशस्त्र प्रहरीका नायब महानिरीक्षक (डीआईजी) दुर्गाप्रसाद भट्टराई र नेपाल प्रहरीका सुदूरपश्चिम प्रदेश प्रमुख नायब महानिरीक्षक (डीआईजी) मोहन आचार्यलाई टेलिफोन गरेर बेपत्ता बुढाथोकीको खोजी कार्य तीब्र बनाउन निर्देशन दिएका हुन् ।