काठमाडौंको चाबहिलमा रहेको सेन्ट लरेन्स कलेजका शिक्षकले छात्रामाथि यौन दुर्व्यवहार गरेको भन्दै विद्यार्थीहरूले गौशला प्रहरी वृत अगाडि प्रदर्शन गरेका छन् ।
कलेजकै कोअर्डिनेटर समेत रहेका जनार्दन अधिकारीले कक्षा ११ को छात्राहरूमाथि यौन दुर्व्यवहार गरेको भन्दै विद्यार्थीले प्रदर्शन गरेका हुन्।
कक्षा ११ मा पढ्ने छात्राहरूलाई आफ्नो इच्छा पुरा गर्दिए कलेजको शुल्कदेखि अन्य शुल्कहरू छुट गराइदिने समेत अधिकारीले बताएको विद्यार्थीको भनाई छ ।
विद्यार्थीले कलेजमा प्रदर्शन सुरु गरेपछि प्रहरीले आरोपितलाई गौशाला वृतमा ल्याएको छ । विद्यार्थीहरू अहिले महानगरी प्रहरी वृत गौशला अगाडि नै प्रदर्शन गरिरहेका छन् ।
पछिल्लो समय बलात्कारका घटना सार्वजनिक भइरहेका बेला राजधानीको एक नीजि कलेजमा भएको यौन दुर्व्यवहारको घटनाले विद्यार्थीहरू आक्रोसित बनेका हुन् ।
सोही कलेजकी पूर्वविद्यार्थी समिता अधिकारीका अनुसार पीडित युवतीभन्दा आरोपित अधिकारीको छोरीको उमेर बढी छ । आफ्ना छोरीभन्दा सानो उमेरको छात्रामाथि यौन दुर्व्यवहार गरेको आरोप ती शिक्षकमाथि लागेको हो ।
सबै तस्विर : सुजन तिमिल्सिना
