प्रेस काउन्सिल नेपालले अनलाइन पत्रकारितालाई व्यवस्थित र जिम्मेवार बनाउन ‘पत्रकार आचारसंहिता अभिमुखीकरण कार्यक्रम’ लाई तीव्र बनाएको छ ।
काउन्सिलको पछिल्लो अभियानअन्तर्गत अनलाइन दर्ताअघि सञ्चालक, सम्पादक र प्रतिनिधिले अनिवार्यरूपमा अभिमुखीकरणमा सहभागी हुने कार्यक्रम ल्याएको हो । काउन्सिलले आचारसंहिता र विभिन्न निर्देशिकाबारे जागरण ल्याउन विज्ञहरूको रोष्टर बनाई अभिमुखीकरण सुरू गरेको छ ।
नेपाल पत्रकार महासंघका अध्यक्ष विपुल पोख्रेलले महासंघ र प्रेस काउन्सिलले संयुक्तरूपमा जारी गरेको आचारसंहिता पत्रकारको मुलमन्त्र भएको बताए ।
पत्रकारको साझा र विशिष्ट किसिमका चरित्रबाटै सत्यतथ्य र सन्तुलित समाचारको सम्प्रेषण गर्न सकिने अन्यथा समाजमा नकारात्मक सञ्चार हुने उनको भनाइ छ । पत्रकारितामा सानो गल्तीले ठूलो दुर्घटना निम्ताउने भएकाले सावधानी अपनाउनुपर्ने भन्दै काउन्सिलको यो अभियान स्वागतयोग्य भएको अध्यक्ष पोखरेलको भनाइ थियो ।
प्रेस काउन्सिलका अध्यक्ष बालकृष्ण बस्नेतले काउन्सिलले जिल्ला जिल्लामा गएर आचारसंहिता जागरण अभियान गर्दै गरेकोमा नयाँ अनलाइन सूचीकरण हुँदा अनिवार्य आचारसंहिता अभिमुखीकरणमा सामेल हुनुपर्ने अभ्यासले सचेतना बढ्ने विश्वास गरेका थिए ।
पछिल्लो समय अनलाइनलाई व्यवस्थित गर्न सरोकारवाला निकायसँग समन्वय गरी काम भइरहेको भन्दै अध्यक्ष बस्नेतले प्रेस स्वतन्त्रता र उत्तरदायी पत्रकारिता एकै सिक्काका दुई पाटा भएको भन्दै उहाँले अभिमुखीकरणलाई निरन्तरता दिने बताए ।
काउन्सिलका मुख्य अधिकृत झबिन्द्र भुसालले सहजिकरण गर्नुभएको कार्यक्रममा काउन्सिलका उपप्रशासकीय अधिकृत रामशरण बोहरालगायत भौतिकरूपमा र जुममार्फत अनलाइन सञ्चालक/सम्पादक/रिपोर्टर सहभागी थिए । कार्यक्रममा नयाँ दर्ता भएका अनलाइनका प्रकाशक, सम्पादक, प्रतिनिधिलाई आचारसंहिता र सञ्चारसम्बन्धी विभिन्न निर्देशिकाबारे विज्ञद्वारा अभिमुखीकरण गराइएको हो ।
अब अनलाइन सूचीकरणको प्रमाणपत्र लिनुअघि अभिमुखिकरणलाई काउन्सिलले अनिवार्य गरेको छ ।
