प्रेस काउन्सिल नेपालका अध्यक्ष बालकृष्ण बस्नेत मंगलबार दोलखाको चरिकोटमा सम्मानित भएका छन् । पत्रकारितामार्फत लामो समयदेखि जनअधिकारको पक्षमा काम गरेको भन्दै उनलाई सम्मान गरिएको हो ।
दोलखाको पुरानो र ठूलो शैक्षिक संस्था गौरीशंकर बहुमुखी क्याम्पसले आफ्नो वार्षिकोत्सबको दिन पारेर युवा पत्रकार बस्नेतलाई सम्मान गरेको हो ।
प्रमुख अतिथि समाजसेवी एवं क्याम्पसका संस्थापक अध्यक्ष आत्मकृष्ण श्रेष्ठले दोसल्ला र सम्मानपत्रसहित बस्नेतलाई सम्मान गरेका हुन् ।
काउन्सिल अध्यक्ष बस्नेतको जन्मस्थान समेत दोलखाको भिमेश्वर नगरपालिका ५, विसुन्टोल हो । बस्नेतले २०५२ सालमा छलफल साप्ताहिकबाट पत्रकारिता सुरु गरी २०५७ सालमा कान्तिपुर पब्लिकेशन्स प्रवेश गरेका थिए । करिब २० वर्ष कान्तिपुर दैनिकमा सक्रिय पत्रकारिता गरेका बस्नेत ९ महिना अघि प्रेस काउन्सिल नेपालका अध्यक्ष भएका हुन् ।
२०३८ सालमा स्थापित उक्त क्याम्पस हिमाली जिल्लाहरुमध्ये देशकै सबैभन्दा ठूलो हो । कार्यक्रममा बोल्दै प्रमुख अतिथि श्रेष्ठले शिक्षा क्षेत्रलाई राजनीति भन्दा माथि राख्नुपर्ने सुझाव दिए । सञ्चालक समिति अध्यक्ष राजेन्द्र मानन्धरले क्याम्पसले आज सम्म गरेको प्रगति र भावी योजना सुनाएका थिए ।
त्यसअवसरमा नेपाल पत्रकार महासंघका केन्द्रीय सदस्य रमेश खतिवडासहित अन्य व्यक्तित्वलाई समेत सम्मान गरिएको थियो ।