संस्कृति, पर्यटन तथा नागरिक उड्डयनमन्त्री प्रेमबहादुर आलेले महाशिवरात्रि अगाडि नै पशुपति क्षेत्रमा भगवान् शिवका मूर्ति तथा देवीदेवताका चित्र चित्रण गर्न निर्देशन दिएसँगै पशुपति क्षेत्रमा पेन्टिङको काम धमाधम भैरहेको छ ।
पशुपति विकास कोषका सदस्य सचिव मिलनकुमार थापाले केटिएम दैनिकलाई बताए अनुसार शिवरात्री अघि सम्म सम्पन्न गर्ने गरी अहिले चार जना चित्रकारहरूले पाशुपत क्षेत्रमा रहेका पर्खालहरुमा पेन्टिङ बनाउने काममा संलग्न छन् ।
घरको बाहिरी भित्तामा प्रयोग गरिने “वेदर कोट” को प्रयोग गरिएको छ । एउटा पेन्टिङ सक्नको लागि दुई दिन समय लाग्ने बताइएको छ ।
पशुपति क्षेत्रमा विभिन्न देवीदेवताका चित्रसहितको ‘
वाल पेन्टिङ’ दश वर्षसम्म टिक्ने चित्रकारको भनाई छ ।
फाल्गुन ५ गते पशुपति निरीक्षण गर्न पुगेका मन्त्री आलेले देश विदेशबाट आउने लाखौँ भक्तजनको सहज सुविधा र आकर्षण बढाउन पशुपतिको अहिलेको अव्यवस्थालाई पूरै हटाएर व्यवस्थित र आकर्षक बनाइने बताएका थिए ।