प्रेस काउन्सिल नेपालले विगत तीन वर्षदेखि रोकिएको पत्रपत्रिकाको वर्गीकरणको नतिजा सार्वजनिक गरेसँगै सामाजिक सञ्जालमाथि कडा निगरानी गर्न थालेको छ ।
सामाजिक सञ्जाल रचनात्मक कम र छाडा बढी भएकाले सञ्चारमाध्यमको दुरुपयोग रोक्न कडा निगरानी र कारबाहीको तयारी भइरहेको अध्यक्ष बस्नेतले केटिएम दैनिकलाई बताए । काउन्सिलको ३ दिन सम्म बसेको बोर्ड बैठकले पत्र पत्रिकाको नतिजा प्रकाशनदेखि सामाजिक सञ्जाल दुरुपयोग गर्नेमाथि कारबाहीसम्म विभिन्न रणनीति अपनाउने निर्णय गरेको छ ।
समयमा पत्र पत्रिकाको नतिजा सार्वजनिक नहुँदा साना लगानीका स्वरोजगारमुखी पत्रपत्रिकालाई समस्या पर्दै आएकोमा अब समाधान उन्मुख हुने धेरै विश्वास लिएका छन् । एक साप्ताहिक पत्रिकाका प्रकाशकले केटिएम दैनिकसँग भने “वर्गिकरणको नतिजा नआएको ३ वर्ष भैसक्यो, अब विस्तारै बन्द गर्छ होला जस्तो लागेको थियो । साप्ताहिक पत्रिका नै बन्द गरेर अनलाइन मात्रै चलाउँ कि भन्ने दोधारमा थिएँ । अब भने आश पलाएको छ ।”
काउन्सिलले देश भरका ८० वटा पत्रपत्रिकाले आचारसंहिताको गम्भीर उल्लंघन गरेकाले कारबाही गर्दै वर्गीकरणको नतिजा निकालेको छ ।
फेसबुक, ट्वीटरलगायत पत्रकार र सञ्चारमाध्यमको सामाजिक सञ्जाल व्यवस्थापनका लागि र ती माध्यमबाट हुने आचारसंहिता उल्लङ्घनलाई काउन्सिलले निगरानि गर्दै आएको छ । सामाजिक सञ्जालमार्फत जथाभावी सामम्री राख्नेलाई प्रकृति हेरेर बन्द गराउन सम्बन्धित निकायलाई पत्रचार गर्नेसम्मको तयारी भएको छ ।
पछिल्लो वर्षको वर्गीकरणमा ४५ वटा पत्रपत्रिकाले हुबहु सारेकाले वर्गीकरण प्रक्रियाबाटै हटाउने निर्णय भएको छ । आ.व. २०७५/०७६ को वर्गीकरण अनुसार पत्रकार आचारसंहिता पालनामा जिम्मेवार नदेखिएका ३६ वटा पत्रपत्रिका हुबहु रहेका छन् । ती पत्रपत्रिकाको वर्ग कायम गरिएको छैन । त्यस्तै आ.व. २०७६-०७७ को वर्गीकरण अनुसार पत्रकार आचारसंहिता पालना नगर्ने ४५ पत्रपत्रिका हुबहुमा परेका छन् ।
पत्रकारितामा पछिल्लोसमय आचारसंहिता उल्लंघनका घट्नाहरु बढेको, सञ्चारमाध्यमहरुले गैरजिम्मेवार भई विभिन्न समाचार सम्प्रेषण गर्ने, हुबहु कपी गर्ने, जथाभावी अडियो तथा भिडियो बनाई सामाजिक सञ्जालमा सम्प्रेषण गर्ने गरेको सम्बन्धमा काउन्सिलमा उजुरी परेको काउन्सिलले जनाएको छ ।