धुर्मुस सुन्तली फाउन्डेसनका अध्यक्ष सिताराम कट्टेल र उपाध्यक्ष कुञ्जना घिमिरेविरुद्ध अख्तियार दुरुपयोग अनुसन्धान आयोगमा उजुरी परेको छ । चितवनको भरतपुर १५ मा अन्तर्राष्ट्रिय क्रिक्रेट रङ्गशाला निर्माण गर्ने भनेर रकम उठाएर निर्माण कार्य अपूरो छोडेको भन्दै धुर्मुस–सुन्तली फाउन्डेसनविरुद्ध अख्तियारमा उजुरी परेको हो ।
वाग्मती प्रदेश क्रिकेट सङ्घका कोषाध्यक्ष अनिल अधिकारीले उनीहरूविरुद्ध आर्थिक अपचलन र ठगी गरेको आरोप लगाउँदै पक्राउ गरी अनुसन्धान गर्न उजुरीमा माग गरेका हुन् । अधिकारीले रङ्गशाला निर्माणमा व्यापक अनियमितता भएको भन्दै उनीहरूविरुद्ध छानबिनको मागसमेत गरेका छन् ।
आयोजना अलपत्र पारेको र कति रकम उठ्यो भन्नेसम्मको पारदर्शी हिसाब–किताब सार्वजनिक गर्न नसकेपछि उजुरी दिएको उनको भनाइ छ । दुई पृष्ठ लामो निवेदन हस्तलिखित उजुरी अधिकारीले आइतबार बिहान अख्तियार दुरुपयोग अनुसन्धान आयोग टङ्गाल काठमाडौँमा दर्ता गराएको जानकारी दिए ।
‘देश विदेशमा रहेका नेपालीहरूबाट चन्दा सङ्कलन र भरतपुर महानगरपालिका लगायतका सरकारी कार्यालयबाट ५७ करोडभन्दा बढी रकम उठाई हाल सो रङ्गशालाको सरकारी इन्जिनियरहरूबाट मूल्याङकन गर्दा १७ प्रतिशत पनि निर्माण कार्य पूरा नगरी उल्टै १७ करोड ऋण तिर्न पर्ने रकम देखाई परियोजना अलपत्र पारेर फरार रहेकोमा निजहरूलाई पक्राउ गरी आर्थिक अपचलन र ठगी मुद्दा माग गर्दछु,’ अधिकारले निवेदनमा लेखेका छन् ।
