कवाडी सङ्कलन गर्नेहरूले पैसा कमाउने अनौठो धन्दा थालेका छन् । नेपाल सरकारले करोडौँको बजेटमा बनाएका तटबन्धका तारजाली चोरेर बेच्ने गरेका पाँच जनलाई मोरङ प्रहरीले नियन्त्रणमा लिएसँगै पैसा कमाउने अनौठो धन्दा बाहिरिएको हो ।
कटान नियन्त्रणका लागि सरकारले खोलाहरूमा बनाएको तारजाली काटेर बिक्री–वितरण गरेको आरोपमा मोरङ प्रहरीले पाँच जनालाई समातेको हो । मोरङका बक्राहा, चिसाङ, लोहन्द्रा, केसलिया, सिङ्गियालगायत दजैनौँ खोलामा ठुलो बजेटमा निर्माण गरिएका तारजाली काटेर बिक्री–बितरण गरेको पाइएको छ ।
कानोपोखरी, बेलवारी मिक्लाजुङ, लेटाङ, दर्वेशा, रङ्गेलीलगायतका ठाउँहरूका खोलामा केही मानिसले पैसा कमाउनकै लागि खोलामा लगाएको तारजाली तोडेर कवाडीलाई बिक्री गर्ने गरेको पाइएको हो । भारतबाट आएका कवाडीहरूले सस्तो दाममा तारजाली खरिद गर्ने गरेको पाइएको छ ।
साइकलमा आउने कवाडी सङ्कलकहरूले ३० रुपैयाँ किलोमा त्यस्ता तारजाली खरिद गर्ने गरेको पाइएको छ । प्रायःजसो उत्तरी मोरङ क्षेत्रबाट बढी मात्रामा तारजाली खरिद गरेर ल्याउने र रातिको समयमा रङ्गेली नाका भएर भारततर्फ लैजाने गरेको पाइएको छ ।
इलाका प्रहरी कार्यालय रङ्गेलीले तारजाली र साइकलसहित पाँच जना कवाडीलाई पक्राउ गरेको छ । तथापि, उनीहरूकोे पहिचान प्रहरीले खुलाएको छैन । उनीहरूलाई साइकलमा तारजाली हालेर भारत लैजानेक्रममा पक्राउ गरिएको रङ्गेलीका प्रहरी निरीक्षक अनमोल खड्काले बताए ।