प्रेस काउन्सिल नेपालले विज्ञापनका नाममा गलत क्रियाकलाप नगर्न संचार माध्यमहरुलाई आग्रह गरेको छ ।
काउन्सिलले आइतबार एक प्रेस विज्ञप्ति जारी गर्दै, मागबमोजिम विज्ञापन नपाएको खण्डमा संस्था, कम्पनी एवम् व्यक्तिको बारेमा तथ्यहीन, आधारहीन, अपुष्ट आरोपहरू लगाई समाचार प्रकाशन-प्रसारण गर्ने गरेको पाइएको जनाएको छ ।
विज्ञप्तीमा भनिएको छ ‘पछिल्लो समय कतिपय सञ्चार माध्यम तथा सम्बद्ध व्यक्तिबाट विज्ञापनको अनावश्यक दबाब एवम् अन्य ‘बार्गेनिङ’ गर्ने र मागबमोजिम नभएमा संस्था, कम्पनी एवम् व्यक्तिको बारेमा तथ्यहीन, आधारहीन, अपुष्ट आरोपहरू लगाई समाचार प्रकाशन-प्रसारण गर्ने गरेको भनी गुनासाहरू प्राप्त भएको हुने गरेका छन्’ ।
प्रेस काउन्सिल नेपालका उप प्रशासकीय अधिकृत रामशरण बोहराले जारी गरेको विज्ञप्तीमा सञ्चार माध्यम एवम् सम्बद्धबाट हुने त्यस्ता कियाकलाप प्रचलित कानुन, पत्रकार आचारसंहिता विपरीत भएको बताइएको छ ।
यस्तो कार्य पत्रकारिताको दुरुपयोग हो । समग्र प्रेसलाई धुमिल्याउने त्यस्ता गतिविधि नगर्न/नगराउन तथा हुन नदिनेतर्फ सजगता अपनाउन प्रेस काउन्सिल नेपाल सम्वद्ध पक्षको ध्यानाकर्षण गराउँदछ।
साथै यस्ता कार्यहरू भएको खण्डमा प्रमाणसहित प्रेस काउन्सिल नेपालमा उजुरी दिन काउन्सिलले अपिल समेत गरेको छ ।
