नेपाली काँग्रेसको १४ औं महाधिवेशनअन्तरगत महामन्त्री पदको लागि भैरहेको मतगणनाको प्रारम्भिक मतपरिणाम सार्वजनिक भैरहेको छ । मंसिर २७ गते भएको निर्वाचनको मतगणना कांग्रेस मुख्यालय सानेपामामा चलिरहेको छ।
नेपाली कांग्रेसको दुई महामन्त्रीका लागि भएको निर्वाचनको सुरुवाती मतगणनामा गगनकुमार थापा र विश्वप्रकाश शर्माले अग्रता लिएका छन् । उनलाई देउवा समूहका उम्मेदवार प्रकाशशरण महतले पछ्याइरहेका छन् ।
१ हजार ७५ मतगणना गर्दा गगन थापाले ६७३ मत प्राप्त गरेका छन् भने विश्वप्रकाश शर्माले ४३४ मत प्राप्त गरेका छन्। थापाले प्राप्त गरेको मत ६२ दशमलव ६० प्रतिशत हो भने शर्माले प्राप्त गरेको मत ४० दशमलव ३७ प्रतिशत हो ।
त्यसैगरी डा. प्रकाशशरण महतले ३५३ मत, प्रदीप पौडेलले ३४२ मत, र डा. मिनेन्द्र रिजालले १९४ मत प्राप्त गरेका छन्। त्यसैगरी महामन्त्रीका अर्का उम्मेदवार डा. राजराम कार्कीले ३८ मत प्राप्त गरेका छन्।
महामन्त्रीमा गगन र मिनेन्द्र शेखर कोइराला समूहबाट उम्मेदवार बनेका थिए भने प्रदीप र प्रकाशशरण शेरबहादुर देउवा समूहका उम्मेदवार हुन्। त्यसैगरी विश्वप्रकाश प्रकाशमान सिंह समूहबाट र राजारामले विमलेन्द्र निधि समूहबाट उम्मेदवारी दिएका थिए।
यसअघि सभापतिमा शेरबहादुर देउवा र दुई उपसभापतिमा पूर्णबहादुर खड्का र धनराज गुरुङ निर्वाचित भइसकेका छन्।
सोमबारको मतदानमा चार हजार ७४३ मतदातामध्ये चार हजार ६७९ मतदाताले मतदान गरेका थिए । कांग्रेस केन्द्रीय कार्यसमितिका पदाधिकारी र सदस्य गरी १३४ पदका लागि मतदान भएको थियो । सभापति पदको भने महाधिवेशनस्थल राष्ट्रिय सभागृहमा बुधबार मतगणना सम्पन्न भई प्रधानमन्त्री एवं पार्टी सभापति शेरबहादुर देउवा सभापतिमा पुनः निर्वाचित भइसकेका छन् ।
