प्रेस काउन्सिल नेपालका अध्यक्ष बालकृष्ण बस्नेतले गफ र भाषण गरेर मात्रै परिणाम ननिस्कने बताएका छन् ।
प्रेस काउन्सिल नेपालले आयोजना गरेको “मिडियामा हुने महिला हिंसाको अवस्था र न्यूनीकरणका उपाय” विषयक छलफल कार्यक्रममा बोल्दै उनले गफ र भाषण भन्दा पनि काम गरेर देखाउने बताएका हुन् । साथै उनले मिडिया क्षेत्रलाई उत्तरदायी बनाउन र समस्याहरूको समाधान गर्दै लैजाने प्रतिबद्धता समेत व्यक्त गरेका छन् ।
उनले भने, ‘धेरै भयो गफ र भाषण, अब काम गर्ने बेला भएको छ, केही गरेर देखाउने बेला भएको छ । भाषण भन्दा पनि कार्य गरेर प्रेस काउन्सिलमा उँचाइमा पुर्याउने हो । राम्रो सञ्चार गृह र पत्रकार कसरी बनाउने, आचारसंहितालाई कसरी व्यवस्थापन गर्ने, पत्रकारिता क्षेत्रमा महिलाहरूका चुनौती के हुन् र यो पेसामा टिकिरहन कस्तो योजना बनाउने भनेर हामीले जिल्ला व्यापी रूपमा कार्यक्रम गरिरहेको छौँ ।’
अरूको आवाज बुलन्द रूपमा उठाउने महिला पत्रकारहरू माथि हुने हिंसाका उजुरीहरूलाई पहिलो प्राथमिकता दिने उल्लेख गर्दै उनले कसैलाई समस्या भए प्रेस काउन्सिलमा आएर उजुरी दिन आग्रह गरेका छन् ।
महिलासम्बन्धी उजुरी र गुनासा सम्बोधनलाई काउन्सिलले प्राथमिकतामा राख्ने र गोपनीयताको पनि ख्याल गरेर हिंसासम्बन्धी उजुरी सुनुवाइमा काउन्सिल र आयोगले समन्वय गरेर समस्या समाधान गर्ने उनले विश्वास दिलाए ।
सञ्चारमाध्यममा महिला उत्तरदायी सञ्चार निर्देशिकाको कार्यान्वयन गरी लैङ्गिक मैत्री मिडिया बनाउन काउन्सिलले काम गरिरहेको उनले जानकारी दिए ।
कार्यक्रममा सहभागी अधिकांशले मिडियामा महिलामाथि विभिन्न तरिकाबाट हिंसा हुने गरेको, त्यसका बारेमा उजुरी गर्ने उचित निकायसमेत नभएको र आफूभन्दा माथिल्लो निकायमा गुनासो गर्दा पिडितको जागिर नै खोसिने तथा झनै अपमानित हुनुपर्ने अवस्था रहेको बारे खुलेर कुरा राखेका थिए ।