“समृद्धिका लागि सिभिल बैङ्क” भन्ने नाराका साथ अगाडी बढिरहेको सिभिल बैङ्कले यही मङ्सिर २४ गते देखी “सिभिल बैङ्क डिबेञ्चर २०८८” सर्वसाधारणहरूको लागि विक्री खुल्ला गरेको छ ।
१० वर्षको अवधि रहेको उक्त डिवेन्चरले बजारको चल्तीको भन्दा बढी अर्थात् १० दशमलव २५ प्रतिशत ब्याजदर दिनेछ । प्रति डिवेन्चर रु १ हजार अङ्कित मूल्यका ३० लाख कित्ता डिवेन्चर मध्ये सर्वसाधारणको लागि १२ लाख कित्ता र सङ्घ संस्थाको लागि १८ लाख कित्ता छुट्टाइएको छ ।
सर्वसाधारणहरूले कम्तीमा २५ कित्ता देखि अधिकतम १२ लाख कित्ता सम्म यस ऋणपत्र खरिद गर्न सक्नेछन् । नेपाल धितो पत्र बोर्डद्वारा स्वीकृत प्रदान गरिएको यस ऋणपत्रमा त्रैमासिक रूपमा व्याज भुक्तानी गरिनेछ र नेपाल स्टक एक्सचेन्ज (नेप्से) मा सुचीकृत भई किनबेच समेत गर्न सकिनेछ ।
सर्वसाधारणहरूले आफूले खरिद गर्न चाहेको ऋणपत्र सी–आस्बा सेवामा सहभागी बैङ्क तथा वित्तीय संस्थाहरू र तिनका शाखा कार्यालयहरू मार्फत दरखास्त फाराम प्राप्त गर्न र बुझाउन सक्नेछन् । ऋणपत्रको निष्कासन मङ्सिर २४ गते खुल्ला भई छिटोमा मङ्सिर २८ गते तथा ढिलोमा पौष ९ गते बन्द हुनेछ ।
बैङ्कले निष्कासन गर्न लागेको डिवेन्चरको ब्याजदर हाल नेपाल स्टक एक्सचेन्जमा सुचीकृत डिवेन्चरहरुको औसत ब्याजदर भन्दा बढी तथा हाल वाणिज्य बैङ्कहरूले मुद्दती निक्षेपमा प्रदान गरिरहेको ब्याजदर भन्दा पनि उच्च रहेको छ ।
यसका साथै अन्य धेरै डिवेन्चरहरु भन्दा फरक यस सिभिल बैङ्क डिवेन्चरले त्रैमासिक रूपमै व्याज भुक्तानी गर्नेछ जसले गर्दा लगानीकर्ताले अर्ध वार्षिक भुक्तानी योजना भएकोमा भन्दा अधिक ब्याज आम्दानी प्राप्त गर्नेछ । सामूहिक लगानी कोषको लागि छुट्टाइएको ५ प्रतिशत डिवेन्चरको लागि २ गुणा भन्दा बढी आवेदन प्राप्त भएको समेत बैङ्कले जनाएको छ ।