काठमाडौंको गौरीघाटमा अस्ताउँदो सूर्यलाई अघ्र्य दिइएको छ । आज राष्ट्रपति विद्यादेवी भण्डारीले पनि गौरीघाट पुगेर अघ्र्य दिएकी थिइन् ।
सुरुआती समयमा तराईमूलका समुदायले मात्र मनाउँदै आएको यो पर्व पछिल्लो समयमा अन्य मूलका समुदायले पनि मनाउन थालेपछि भक्तजनको सङ्ख्या उल्लेख्य रुपमा वृद्धि हुन थालेको छ।
छठीमाताको पूजा गर्दा मनोकामना पूरा हुने विश्वास छ । यस पर्वमा पूजा गर्नाले रोग निको हुने जनविश्वास रहँदै आएको छ । छठ पर्वको दिन दिउँसोदेखि भक्तजन पूजापाठ एवं कथा सुन्ने काम गर्ने र साँझमा अस्ताउँदो सूर्यलाई अघ्र्य चढाउने गर्दछन् ।
छठीमाताको भाकल गर्ने (कोशी बस्ने)ले रातभर जागाराम बसी पूजा पाठ गर्ने, कथा सुन्ने र भजनर्कितन गर्ने गर्दछन् । अन्य भने साँझमा अघ्र्य चढाउने र बिहान उदाउँदो सूर्यलाई अघ्र्य चढाएर यो पर्ब मनाउने गर्दछन् । अस्ताउँदो सूर्य र उदाउँदो सूर्यलाई अघ्र्य चढाउँदा स्वास्थ्य राम्रो हुने जनविश्वास छ ।
कातिक शूक्ल चतुर्थीदेखि सप्तमीसम्म मनाइने छठ पर्व भोलि बिहान उदाउँदो सूर्यलाई अघ्र्य दिएपछि सम्पन्न हुनेछ । सहरी र ग्रामीण क्षेत्रमा तराई र पहाडी मूलका नागरिक छठपर्व मनाइरहेका छन् । तराई–मधेशका नागरिकसँगै पहाडी मूलका नागरिकले पनि यो पर्व मनाउन थालेको बताइएको छ ।
पहिला तराईको सीमित क्षेत्रमा मनाउँदै आएको यो पर्व अहिले राष्ट्रिय रुपमा नै मनाउन थालिएको छ । सरकारले यस पर्वका लागि आज सार्वजनिक बिदासमेत दिएको छ ।
थप तस्विरहरू
