मीनप्रसाद शर्मा
प्रदेश १ को मुख्यमन्त्रीमा भोजुरबाट निर्वाचित राजेन्द्र राई नियुक्त भए । भोजपुरको षडानन्द नगरपालिकामा ५१ वर्षअघि जन्मिएका राईले मङ्गलबारबाट प्रदेश १ को तेस्रो मुख्यमन्त्रीमा नियुक्त भएका हुन् । उनी २०७४ सालको आमनिर्वाचनमा भोजपुर १ बाट प्रदेशसभामा निर्वाचित भएका थिए ।
राईले निवर्तमान मुख्यमन्त्री भीमप्रसाद आर्चायको स्थान लिएका हुन् । सुनसरी क्षेत्र नं. १ (ख)बाट प्रदेशसभामा विजयी आचार्य भदौ १० गते बिहीबार प्रदेश १ को दोस्रो मुख्यमन्त्रीमा नियुक्त भएका थिए । २०१६ वैशाख १४ गते धनकुटाको तत्कालीन तेलिया गाविस–६ मा जन्मिएका आचार्यको स्थायी ठेगाना सुनसरीको इनरुवा नगरपालिका–६ हो । पार्टी विभाजन भएको अवस्थामा मुख्यमन्त्री बनेका आचार्य एमालेका १० सांसदले नेकपा (एकीकृत समाजवादी) रोजेपछि अल्पमतमा परेका थिए ।
मुख्यमन्त्री बन्नकै लागि माधवकुमार नेपालको साथ छोडेका आचार्यले विश्वासको मत पाउने अवस्था नदेखेपछि सोमबार राजीनामा दिएका थिए । आचार्यले ६७ दिन मुख्यमन्त्रीको पद सम्हाले । उनी प्रदेश १ मा एमालेबाट मुख्यमन्त्री बनेका शेरधन राईपछि दोस्रो मुख्यमन्त्री बनेका थिए ।
त्यसअघि पनि प्रदेश १ ले भोजपुरबाट मुख्यमन्त्री पाएको थियो । प्रदेश १ को पहिलो मुख्यमन्त्रीका रूपमा भोजपुरबाट निर्वाचित शेरधन राई नियुक्त भएका थिए । भोजपुर क्षेत्र नं १ (ख) बाट प्रदेश सभामा निर्वाचित यिनी २०७४ माघ २ गते १ नम्बर प्रदेशको मुख्यमन्त्रीमा निर्वाचित भएका थिए । उनी २०२७ साल फागुन ११ गते भोजपुरको आमचोक गाउँपालिका–३, थिदिङ्खाको पसलभन्ज्याङ्गमा जन्मिएका हुन् ।
यसरी हेर्दा प्रदेश १ ले भोजपुरबाट दुई र सुनसरीबाट एक जना मुख्यमन्त्री पाएको छ । पहिलो मुख्यमन्त्री भोजपुर, दोस्रो सुनसरी र तेस्रोमा पुनः भोजपुरबाट मुख्यमन्त्री पाएको प्रदेश १ ले अब फेरि सुनसरीबाट मुख्यमन्त्री पाउन सक्ने सम्भावना छ । अब, नेपाली काङ्ग्रेस प्रदेश १ संसदीय दलका नेता राजीव कोइरालाको पालो आउन सक्ने बताइन्छ । पाँच दलीय गठबन्धनको सरकारले आलोपालो सत्ता चलाउन सक्ने सम्भावना छ । कोइराला स्वयम् पनि मुख्यमन्त्रीमा आलोपालो हुनुपर्ने अडानमा छन् ।
यदि, कोइराला मुख्यमन्त्री बनेमा पुनः प्रदेश १ ले सुनसरीबाट मुख्यमन्त्री पाउने छ । कोइराला सुनसरीबाट निर्वाचित भएका हुन् । कोइराला सुनसरी क्षेत्र नम्बर २ ‘ख’ बाट प्रत्यक्षतर्फ प्रदेशसभा सांसदमा विजयी भएका थिए । उनको स्थायी बसोबास पनि सुनसरी नै हो ।