सोमबार रातिदेखि परेको अविरल वर्षाका कारण देशकै ठुलो सप्तकोसी नदीमा पानीको वहाव बढ्न थालेको छ ।
पूर्वी तराईका अधिकांश क्षेत्रमा पछिल्लो सात घण्टायता भएको भीषण वर्षाका कारण सप्तकोसीमा पानीको बहाव बढ्न थालेको जिल्ला प्रशासन कार्यालय सुनसरीका विपद् फोकल पर्सन सुधीर साफीले केटिएम दैनिकलाई जानकारी दिए ।
दिउँसो १२ बजेको मापनअनुसार सप्तकासीमा पानीको बहाव प्रतिसेकेन्ड ६३ हजार ६ सय ३० क्युसेक पुगेको उनले जानकारी दिए । ‘बिहानदेखि नै पानीको बहाव बढ्न थालेको छ’, उनले भने, ‘अहिले १३ वटा ढोका खोलिएको छ । नदीहरूमा आकस्मिक बहाव बढ्न सक्ने भएकाले सबैलाई विशेष सावधानी अपनाउन आग्रह गरेका छौँ ।’
सप्तकोसीमा आज बिहानबाट बहाव निरन्तर बढ्दो क्रममा देखिएको छ । पूर्वी पहाडी भेगमा वर्षा जारी रहेकाले नदीको जलस्तरमा वृद्धि भइरहेको उनले बताए । सप्तकोसी आसपासका क्षेत्रमा असार, साउन र भदौ महिना खतरा मानिन्छ । तर कात्तिकको सुरुआतमा परेको बेमौसमको वर्षाका कारण डुबानको खतरा बढेको छ ।
भारतले सप्तकोसी ब्यारेजका सबै ढोका नखोलेका कारण पनि सप्तकोसी आसपासका क्षेत्रका बासिन्दा बर्सेनि त्रासमा बस्नु पर्ने बाध्यता छ । एक लाख ५० हजार क्युसेक नाघेपछि खतरा मानिन्छ । पानीको बहाव उच्च हुँदासमेत भारतले सप्तकोसी ब्यारेजका सबै ढोका नखोल्ने गरेका कारण सुनसरीको महेन्द्रनगर, प्रकासपुर, हरिपुर, मधुवन, श्रीलङ्का टापुका बासिन्दा त्रसित हुने गरेका छन् ।
