पोर्चुगलका स्टार फुटबलर क्रिस्टियानो रोनाल्डो र जर्जिना रोड्रिग्वेज विगत चार वर्षयता एकसाथ छन् । चार सन्तानका अभिभावकसमेत रहेका ३६ वर्षीय रोनाल्डो र २७ वर्षीय जर्जिना अहिले इङ्ग्ल्यान्डस्थित म्यानचेस्टरमा खुसीसाथ बसिरहेका छन् ।
रोनाल्डो र जर्जिनाले बिहे गरेका छैनन् । तर उनीहरू लिभिङ टुगेदरमा बसेका छन् । स्पेनदेखिको यो जोडी इटाली हुँदै इङ्ग्ल्यान्डसँग सँगसँगै छ । सन् २०१७ यता उनीहरू एकसाथ छन् । जर्जिना स्पेनिस मोडेल हुन् । उनका आफ्नै फ्यान–फलोअर्स छन् । रोनाल्डो सर्वाधिक धेरै फ्यान–फलोअर्स भएका खेलाडी हुन् । उनीहरूबीचको स–सानो विषय चर्चामा हुने गरेको छ ।
रोनाल्डोका चार सन्तान छन् । जर्जिना छोरी एनालाकी आमा हुन् । क्रिस्टियानो जुनियर उनका जेठा छोरा हुन् । सन् २०१० मा जन्मिएका जुनियरकी आमाको नाम भने रोनाल्डोले अहिलेसम्म गोप्य नै राखेका छन् । त्यस्तै, उनले सरोगेसीमार्फत् जुम्ल्याहा छोरी इभा र छोरा म्याटियोसमेत जन्माएका छन् ।
दुवै बिहे गर्न राजी छन् । रोनाल्डो बिहेको प्रस्ताव गर्न उपयुक्त समयको खोजीमा छन् । जर्जिना भने रोनाल्डोको विवाहको प्रस्ताव आउने प्रतीक्षामा छिन् । हालैमात्र जर्जिनाले नेटफ्लिक्समा ‘रोड्रिग्वेज लाइफ’ नामक आफ्नो सोको ट्रेलर सार्वजनिक गरिन् । एक विशेष समारोहबीच भएको सार्वजनिक कार्यक्रममा जर्जिनाले आफू रोनाल्डोबाट विवाहको प्रस्ताव आउने प्रतीक्षामा रहेको सुनाएकी छन् ।
लामो समयदेखि सँगै रहेपनि रोनाल्डोले विवाहको प्रस्ताव नगरेको जनाउँदै उनले चाँडै नै रोनाल्डोको प्रस्ताव आउनेमा आफू ढुक्क रहेको पनि बताएकी छन् । जर्जिनाले भनेकी छन्, ‘आशा गरौँ उनले मलाई चाँडै विवाह गरौँ भन्ने छन् । हुन त हामी दुवै राम्रो पलको प्रतीक्षामा छौँ ।’
तर उनीहरूबीचको सम्बन्धमा रोनाल्डोको परिवार तगारो बनेको छ । विशेषगरी रोनाल्डोकी आमा मारिया डोलोरेसले आफ्नो छोराले जर्जिनासँग विवाह नगरोस् भन्ने चाहेकी छन् । जर्जिनाले आफ्नो छोराको सम्पत्ति देखेर विवाह गर्न चाहेको मारियाको बुझाइ छ । उनी जर्जिनालाई बुहारी बनाउन चाहँदिनन् । आमाले प्रेमिकालाई नस्वीकारेपछि रोनाल्डो हल्का तनावमा रहेको समेत बताइन्छ ।
