नेकपा एमालेका अध्यक्ष केपी शर्मा ओलीले प्रधानन्यायाधीश चोलेन्द्रशमशेर राणाबारे आफ्नो दलले कुनै पनि धारणा नराख्ने बताएका छन् ।
मङ्गलबार बिहान विराटनगरमा मोरङमा प्रेस चौतारीले गरेको पत्रकार भेटघाट कार्यक्रममा बोल्दै ओलीले प्रधानन्यायाधीशको विवादबारे एमालेले कुनै धारणा नराख्ने बताएका हुन् ।
‘यस विषयमा एमालेले बोल्नै पर्ने केही छैन’, उनले भने, ‘यस कुरामा एमाले तटस्थ रहन चाहन्छ । पहिला संवैधानिक इजलास जबरजस्ती फेर्ने, अरूले केही गर्नु नपर्ने अनि सबै प्रधानन्यायाधीशले मात्रै व्यहोर्नु पर्ने । यो राजनीति हो, यो दाउपेच हो । एमाले यसमा संलग्न हुँदैन ।’
यसैगरी, ओलीले अहिले न्यायालय र संसदमा तमासा भइरहेको टिप्पणी गरे । अदालत लोकतन्त्रको स्तम्भ भएको भन्दै बताउँदै निष्पक्ष, स्वतन्त्र र शक्ति पृथकीकरणको सिद्धान्तबमोजिमको न्यायालय हुनुपर्नेमा उनको जोड थियो ।
उनले भने, ‘अदालतको हुर्मत लिने काम भइरहेको छ । कहिले परमादेश जारी गरेर दुनियाँमा नभएको जात्रा देखाइरहेका छन् । कहिले गुटबन्दी, कहिले सट्टापट्टाको कुरा सुनिन्छ । यस प्रकरणका क्रियाकलापहरू सम्मानित सर्वोच्च अदालतजस्ता ठाउँमा हुनु हुँदैन ।’
यस्तै, उनले एमालेले विरोध जनाउँदा पनि तमासा भइरहेको बताए । उनले भने, ‘हामी सरकारमा हुँदा एकजना उभियो संसदमा भने व्यवधान खडा भएको हुनाले संसद् स्थगित हुन्थ्यो । अहिले नेकपा (एमाले)जस्तो देशको सबभन्दा ठूलो पार्टी र प्रमुख प्रतिपक्षले विरोध जनाउँदा जस्केलाबाट हामफालेर, झ्यालबाट हामफालेर, करिडोरबाट छिरेर, पछाडिको ढोकाबाट छिरेर, झ्यालबाट छिरेर मन्त्री आउने र कार्यक्रम सञ्चालन भयो भन्ने तमासा त छँदै छ नि !’
