मोरङको सुन्दरहरैँचा–८ सलकपुरकी २१ वर्षीय रोजिना गिरी (काफ्ले) को मृत्यु प्रकरढाको निष्पक्ष छानबिन गर्न माग गर्दै माइतीपक्षले प्रदर्शन गरेका छन् । उनको हत्या भएको दाबी गर्दै माइतीपक्षले मङ्गलबार इलाका प्रहरी कार्यालय बेलबारी अगाडि प्रदर्शन गरेका हुन् ।
प्रहरीको अनुसन्धान निष्पक्ष हुन नसकेको गुनासो गर्दै दोषीमाथि कारबाहीको माग राखेर उनीहरूले प्रहरी कार्यालय घेराउ गरेका हुन् । प्रदर्शनमा सामाजिक अभियन्ता सावित्री सुवेदी पनि पुगेकी छन् ।
रोजिना आइतबार बिहान सात बजे आफ्नै घरको कोठामा मृत भेटिएकी थिइन् । घटनाको अनुसन्धान इलाका प्रहरी कार्यालय बेलबारीका प्रहरी निरीक्षक सरोज खनाल नेतृत्वको टोलीले गरिरहेको छ । प्रहरीले भने आत्महत्याको आशङ्का गरिरहेको छ । पोस्टमार्टमको रिपोर्ट आएपछि घटनाबारे पुष्टि हुने खनालले जानकारी दिए ।
यता, माइतीपक्षले भने रोजिनालाई हत्या गरेर झुन्डाएको भन्दै सोमबार नै किटानी जाहेरी दिएका थिए । रोजिनाका बुबा धर्मानन्द गिरी र आमा ईन्दिरा गिरीले इलाका प्रहरी कार्यालय बेलबारीमा किटानी जाहेरी दिएका थिए ।
विनोद काफ्ले र उर्लाबारी नगरपालिका–८ दुर्गापुरीकी रोजिना गिरीले २०७७ साल असारमा आफ्नो प्रेमलाई विवाहमा रुपान्तरण गरेका थिए । सामाजिक सञ्जाल फेसबुकबाट भएको चिनजानलाई विवाहमा रूपान्तरण गरेको एक वर्ष पनि पुग्न नपाउँदै उनीहरूको बिछोड भएको हो । विनोद विवाह गरेर रोजिनालाई घरमा राख्दै वैदेशिक रोजगारीका लागि दुबई पुगेका थिए ।
रोजिनाको शव आधा खुट्टा बाहिर र शरीरचाहिँ बक्स पलङमा रहेको, सिरानी च्यापेर घोप्टो परेको अवस्थामा शव फेला परेको थियो । सलको पासोले सिलिङ फेनमा झुन्डिएर आत्महत्या गरिएको भनिए पनि यो आत्महत्या नभएर हत्या भएको, हत्या गरेर झुन्ड्याएको मृतकको आफन्तको आरोप छ ।