सुदूरपश्चिम प्रदेश सरकारले चाँडै बाल अधिकार सम्बन्धी नियमावली र बाल सहभागिता सम्बन्धी कार्यविधि तयार गर्ने भएको छ ।
धनगढीमा सोमबार भएको प्रदेश स्तरीय बाल सहभागिता कार्यविधि सम्बन्धी अन्तरक्रिया तथा सराकारवालाहरुको सुझाव सङ्कलन कार्यक्रममा बोल्दै सामाजिक विकास मन्त्री लालबहादुर खड्काले असोजसम्म बालबालिका सम्बन्धी नियमावली र बाल सहभागिता सम्बन्धी कार्यविधि बनाइसक्ने बताए ।
प्रदेश सरकारले यसअघि नै बालबालिका ऐन जारी गरिसकेको छ । उक्त कार्यक्रममै बोल्दै सामाजिक विकास राज्यमन्त्री मनाकुमारी साउदले आफू बाल अधिकारका लागि बनेका बालक्लवको अनुभव सम्हालेर राजनीतिमा सक्रिय भइरहेको बताउँदै बालअधिकारका क्षेत्रमा आवश्यक पर्ने नीति नियम बनाउन आफूले भूमिका खेल्ने बताइन ।
उनले बाल अधिकार बारे गाउँदेखि सहर सम्म पर्याप्त जानकारी नभएको आफूले पाएको बताइन । उनले भनिन, ‘बाल अधिकार बारे जानकारी दिन र बालबालिकाको भविष्य राम्रो बनाउन बालक्लवहरुले राम्रो भूमिका खेल्न सक्छन् तसर्थ क्लबलाई सक्रिय बनाउन र बाल सहभागिता प्रवर्द्धन गर्न आवश्यक नीतिहरू तय हुनुपर्छ ।’
साथै उक्त कार्यक्रममा सुदूरपश्चिम प्रदेश सामाजिक विकास मन्त्री लाल बहादुर खड्काले प्रदेशमा आवश्यक बालबालिका सम्बन्धी नियमावली, कार्यविधि तथा केही नीतिहरू आवश्यक भएको र उक्त कार्यको लागि बाल अधिकारको क्षेत्रमा क्रियाशील सङ्घ संस्थाहरूसँग समन्वय गर्ने विचार व्यक्त गरे ।