महिला अधिकारकर्मी साबित्रा सुबेदीले सुदूरपश्चिम प्रदेशको मुख्यमन्त्री तथा मन्त्रीपरिषद्को कार्यालय गेट अगाडि कञ्चनपुरकी निर्मला पन्तलाई न्याय दे भन्दै मौन प्रदर्शन गरेकी छन् ।
मङ्गलवार टाउको र मुखमा कालो पटी बाँधेर उनले निर्मलाका बलात्कारीलाई फाँसी दे, मेरो शरीर मेरो अधिकार, निर्मलालाई न्याय दे लगायतका प्लेकार्ड बोकेर प्रदर्शन गरेकी हुन् ।’
‘तीन वर्षदेखि धनगढी पुगेर निर्मलाको न्यायका लागि मुख्यमन्त्रीलाई प्रश्न गर्दै आइरहेकी छु,’ उनले भनिन्, ‘अझै कति वर्ष धनगढीमा आएर निर्मलालाई न्याय दे भनेर कराउनुपर्ने हो ?’
निर्मलालाई न्याय दिएर मुख्यमन्त्रीलाई इतिहास लेख्ने मौका रहेको भन्दै उनले त्यसका लागि ढिलाइ नगर्न आग्रह गरिन् । प्रदेश सरकारले पनि निर्मलालाई न्याय दिन सक्दैन भने उनको न्यायका लागि महिलाहरू तयार रहेको उनको भनाई छ ।
‘निर्मलाको न्यायका लागि हामी महिलाहरू चुप बस्दैनौंं,’ उनले भनिन्, ‘उनलाई न्याय नदिई छोडदैनौं ।’ कञ्चनपुरको भीमदत्त नगरपालिका –२ की १३ वर्षीया निर्मला पन्तको २०७५ साउन १० गते बलात्कारपछि हत्या भएको अवस्थामा घर नजिकैको उखुबारीमा शव भेटिएको थियो ।
मौन प्रदर्शनपछि बोल्दै उनले सरकारलाई बारम्बार निर्मलाको हत्यारालाई कारबाही गर र उनलाई न्याय दे भन्दा पनि सरकार कानमा तेल हालेर बसिरहेको उनको आरोप लगाइन्। ‘जबसम्म निर्मला पन्तले न्याय पाउँदिनन् तबसम्म आफूहरूको आन्दोलन जारी छ’ उनले भनिन् ।
उनले दैनिक पाँच/ सात वटा छोरी चेली बलात्कारको सिकार भएर मर्दा पनि सरकार नबोल्नु विडम्बना भएको बताइन् । ‘महिलाहरू नाङ्गै हिँड्छन् भने पनि कसैलाई बलात्कार गर्ने अधिकार छैन,’ उनले भनिन्, ‘अति भइसकेपछि महिलाहरू आगो बाल्न पनि पछि अट्दैनन् ।’