कैलालीको धनगढी उपमहानगरपालिका–३ मिलनचौकस्थित एएफसी होटलको जुवा प्रकरणमा मुछिएका पाँच जना प्रहरी निलिम्वत भएका छन् । प्रहरी वरिष्ठ उपरीक्षक जनकराज पाण्डेयको नेतृत्वमा जुवा प्रकरणको छानबिनका लागि गठित टोलीको सिफारिसका आधारमा पाँच जना प्रहरी बिहीबार निलम्बित भएका हुन् ।
प्रदेश प्रहरी कार्यालयमा कार्यरत प्रहरी हवल्दार नैना चन्द्र धामी, प्रहरी जवान एकेन्द्र खड्का र प्रेम सिंह धामीलाई प्रदेश प्रहरी कार्यालयले निलम्बन गरेको हो । जिल्ला प्रहरी कार्यालय कैलालीमा कार्यरत प्रहरी जवान कृष्ण प्रसाद जैसी र राम सिंह कुँवर प्रदेश प्रहरी कार्यालयको सिफारिसमा निलम्बनमा परेका हुन् ।
प्रदेश प्रहरी कार्यालयका प्रवक्ता प्रहरी वरिष्ठ उपरीक्षक विक्रम बहादुर चन्दले जुवा प्रकरणमा जोडिएका पाँच जना प्रहरीलाई निलम्बन गरेर अनुसन्धान प्रक्रिया अघि बढाइएको बताए ।
अहिले उनीहरूलाई निलम्बन मात्र गरिएको हो, अनुसन्धानका क्रममा उनीहरूको कसुर देखिए सोही अनुसार कारबाही हुनेछ, एसएसपी चन्दले भने, उनीहरू मुछिएको जुवा प्रकरणमा पेशागत लापरबाही वा आर्थिक पाटो लगायतका सबै विषयमा अनुसन्धान भइरहेको छ ।
