नेपाली सेनाले साउनदेखि चैतसम्म देशका विभिन्न ब्यारेकबाट बख्तरबन्द गाडीको अभ्यास गर्ने भएको छ ।
नेपाली सेनाले बुधबार सूचना जारी गर्दै काठमाडौंको सितापाइलामा तैनाथ गणले भदौदेखि चैतसम्म, सुनसरी ब्यारेक इटहरीमा तैनाथ गुल्मले साउनमा तथा बोराडाँडी ब्यारके कैलालीमा तैनाथ गुल्मले साउन र भदौ महिनामा बख्तरबन्द गाडीको अभ्यास गर्ने जनाएको छ ।
सीतापाइला गणले भदौ १४, असोज ११, कात्तिक १५, मंसिर १३, पुस १२, माघ १०, फागुन २३ र चैत १४ गते काठमाडौंको चक्रपथमा अभ्यास गर्नेछ ।
यसैगरी साउन १४ गते सुनसरी ब्यारेकबाट इटहरी चोक, ट्याङ्ग्रा चोक, हवाई चोक, तालतलैया हुँदै अभ्यास गरिनेछ भने साउन २५ र ३२ गते पनि सुनसरी ब्यारेकबाट अर्को रुटमा अभ्यास गर्ने जनाइएको छ ।
यस्तै धनगढीको बोराडाँडी ब्यारेकबाट साउन १४, २१ र २८ गते तथा भदौ ३, १०, १७ र २४ गते बख्तरबन्द गाडीको अभ्यास गरिने सेनाले जनाएको छ ।
सेनाले अभ्यास गर्ने बख्तरबन्दको मिति र स्थान :
यसअगाडि कहिले चले बख्तरबन्द गाडीहरू
२०७७ साल माघ १९ गते राति काठमाडौंको सडकमा नेपाली सेनाले बख्तरबन्द गाडी गुडाएको थियो । त्यही दिन म्यानमारमा सेनाले सत्ता आफ्नो हातमा लिएको दिन थियो ।
माघ १९ को दिन काठमाडौंका सडकमा नै नेपाली सेनाका गाडीहरू गुडेपछि आम मानिसहरुमा एक किसिमको आशंका भने पैदा भएको देखिएको थियो । यसअघि तत्कालीन राजा ज्ञानेन्द्र शाहले आफ्नो शासन हातमा लिँदा बख्तरबन्द गाडी सडकमा निकालिएको थियो।
त्योबेला सैनिक प्रवक्ता सन्तोष बल्लभ पौडेलले यसलाई नियमित अभ्यासको रुपमा मात्र हेरिदिन भनेका थिए । त्यसको पर्सिपल्ट अर्थात माघ २१ गते बिहान ५ बजे सितापाइलबाट निस्केका बख्तरबन्द गाडीहरू काभ्रेको पाँचखाल पुगेक सोही दिन बेलुका ८ बजे काठमाडौं फर्केका थिए ।
माघ २२ गते नेपाल कम्युनिस्ट पार्टी (नेकपा) को प्रचण्ड-माधव समूहले तेस्रो चरणको आन्दोलनमा स्वरुप नेपाल बन्द गरेको दिन धनगढीको कैलालीमा नेपाली सेनाका बख्तरबन्द गाडीहरू सडकमा गुडेका थिए । आम हडतालले पुरै ठप्प रहेको धनगढीका सडकमा नेपाली सेनाले साइरनसहित बख्तरबन्द गाडी चलाएको थियो ।