सङ्खुवासभामा मितबाबुको हत्या गरेको आरोपमा एक जना पक्राउ परेका छन् । खाँदवारी नगरपालिका–९ का ४७ वर्षीय लक्ष्मण कुमालको हत्या गरेको आरोपमा भोजपुरको साल्पासिलिचो गाउँपालिका–४ घर भई बिगत ३ वर्षदेखि तुम्लिङटार आसपास एरियामा बसोबास गर्ने २५ वर्षीय युवराज राईलाई प्रहरीले पक्राउ गरेको हो ।
लक्ष्मण र युवराज मितबुबा–मितछोरा हुन् । गत असार ३० गते कुमाल आफ्नै घरमा मृतावस्थामा फेला परेका थिए । घटनास्थलको प्रकृति हेर्दा हत्या भएको अनुमान गरी अनुसन्धान थालेको जिल्ला प्रहरी कार्यालय संखुवासभाको प्रहरी टोलीले आइतबार राईलाई पक्राउ गरेको हो ।
अनुसन्धानका क्रममा प्रहरी टोलीले राईलाई पक्राउ गरी सोधपुछ गरेको थियो । सोधपुछका क्रममा राईले घटनामा आफ्नो संग्लग्नता रहेको स्वीकार गरेको प्रहरीले जनाएको छ ।
साथै उनले खाना पकाउने क्रममा तरकारी घोप्टिएको निहुँमा खुकरी प्रहार गरेको खुलाएको संखुवासभाका प्रहरी प्रवक्ता इन्सपेक्टर सुभेष अधिकारीले जानकारी दिए । ‘उनीहरू दिउँसो २–४ जना भेला भएर रक्सी खाएर बसेका रहेछन्’, इन्सपेक्टर अधिकारीले भने, ‘साँझ खाना बनाउने क्रममा मितबुबाका कारण तरकारी घोप्टिएपछि त्यही निहुँमा विवाद भएर युवराजले खुकुरी प्रहार गरेको पाइयो ।’ घटना सम्बन्धमा थप अनुसन्धान भइरहेको उनले बताए ।