मोरङको रङ्गेली नगरपालिकामा जन्मिनेबितिकै छोरीको हत्या गरेको आरोपमा एकै परिवारका चार जना पक्राउ गरेको प्रहरीले थप एक जनालाई पक्राउ गरेको छ ।
रङ्गेली–५ आँपगाछीमा शिशु हत्या आरोपमा प्रहरीले शिशुकी आमा, बुबा, हजुरआमा र हजुरबुबालाई पक्राउ गरेको इलाका प्रहरी कार्यालय रङ्गेलीको प्रहरी टोलीले उनीहरूका छिमेकी अजयकुमार सरदारलाई पक्राउ गरेको हो ।
यसअघि प्रहरीले शिशुकी आमा २५ वर्षीय खुश्वु मण्डल, बुबा २८ वर्षीय अरुण मण्डल, हजुरबुबा ५० वर्षीय नागेश्वर मण्डल र हजुरआमा ४८ वर्षीया उर्मिला मण्डललाई पक्राउ गरेको थियो । थप अनुसन्धानका क्रममा प्रहरीले खुश्वुसँग अवैध सम्बन्ध राख्ने अजयलाई पक्राउ गरेको हो ।
आँपगाछी टोल बस्दै आएका अरुण मण्डलकी पत्नी २५ की खुस्बु मण्डलले आइतबार राति ८ः३० बजे छोरी जन्माएकी थिइन् । यसअघि उनका तीन जना छोरी छन् । अरुण र खुश्बुका भने ८, ६ र साढे ३ वर्षका तीन जना छोरी छन् ।
उनले घरमै छोरी जन्मिएको केही समयपछि आफैँ ब्ल्यान्केटले बेरिन् । घरमा विवाद भएपछि बेरेकै ब्ल्यान्केटले थिचेर हत्या गरिन् । हत्यापछि करिब पाँच सय मिटर टाढा आमा–बुवाले सञ्चालन गर्दै मदिरा पसल ल्याइन् ।
हत्यापछि चारै जनाले मिलेर पसल भित्रै खाल्डो खनेर शिशुको शवलाई गाडे । त्यसको भोलिपल्ट शिशुको हत्या आरोपमा इलाका प्रहरी कार्यालय रङ्गेलीले चारै जनालाई पक्राउ गरेको थियो ।
श्रीमानलाई ढाँटेर जन्माइन् शिशु
खुश्वुका श्रीमान् गत चैतमा वैदेशिक रोजगारीबाट स्वदेश फर्किएका थिए । घर आउँदा श्रीमतीलाई गर्भवती देखेपछि उनले यसबारे सोधेका थिए । तर पत्थरीको शल्यक्रिया गरेको जनाउँदै उनले श्रीमानलाई ढाँटेकी थिइन् ।
तर आइतबार राति साढे आठ बजे घरमै शिशुको जन्म भएपछि उनीहरूबीच खटपट भएको थियो । आफू विदेशबाट फर्किएको छोटो समयमै श्रीमतीले सन्तान जन्माएपछि अरुणले घरमा झगडा गरेका थिए ।
झगडापछि खुश्बुले शिशुको हत्या गरेको र परिवारका सदस्य शव व्यवस्थापन गरेको प्रहरीले जनाएको छ । उनीहरूले रङ्गेली–५ मा आफूहरूले सञ्चालन गरिरहेको मदिरा पसलभित्र खाल्डो खनेर गाडेका थिए ।
सोमबार राति उनीहरू पक्राउ परेपछि भने अजय फरार भएका थिए । अजयलाई खुश्बुले दिएको बयानका आधारमा गाउँमै लुकेर बसेको अवस्थामा बिहीबार पक्राउ गरिएको प्रहरीले जनाएको छ ।
यता, श्रीमानको अनुपस्थितिमा खुश्बुसँग अवैध सम्बन्ध राख्ने अजय पनि विवाहित हुन् । १७ महिनाअघि बिहे गरेका उनको घरमा श्रीमती र सात महिनाकी छोरी रहेको प्रहरीले जनाएको छ ।
उनीविरुद्ध प्रहरीले कर्तव्य ज्यान मुद्दा चलाउन बिहीबार नै अदालतबाट म्याद थप गरेर घटनाको अनुसन्धान अघि बढाएको छ । उनीविरुद्ध जबरजस्ती करणी मुद्दामा पनि कारबाही अघि बढाउने प्रहरीको तयारी छ ।
