मोरङको सुनवर्षी नगरपालिका–४ घर भएका ६८ वर्षीय टिनलाल ताजपुरियाले आफ्नो छोरालाई पटक–पटक मादक पदार्थ सेवन (मापसे) नगर्न आग्रह गर्थे । ४२ वर्षका छोरा दयालु ताजपुरियाले रक्सी पिएकै कारण घरमा झै–झगडा बढेपछि वृद्ध उमेरका बुबा टिनलालले प्रायः रक्सीले मातेर घर आएका दयालुलाई सम्झाउँथे ।
छोराले मापसे गरेर राति होहल्ला गर्न थालेपछि टिनतालले सम्झाईबुझाई गर्दै त्यसो नगर्नू भन्दै सम्झाईबुझाई गर्थे । विभिन्न तबरका आग्रह गर्थे । तर दयालुले भने बाबुको आग्रहलाई रिसिइबीमा परिणत गरेका थिए ।
विवादपछि रिसइबी साँधेर बसेका दयालुले शनिबार बिहान रक्सी पिएकै झोँकमा बाबु टिनलाललाई सुतेकै अवस्थामा दयालुले ढुङ्गा प्रहार गरे । सुतेको ओछ्यानबाट उठ्न नपाउँदै बाबुलाई ढुङ्गाले प्रहार गरेका दयालु मदिराको नसामा थिए ।
जिल्ला प्रहरी कार्यालय मोरङका निमित्त प्रहरी नायव उपरीक्षक मञ्जील मुकारुङका अनुसार मापसे गरेकै विषयलाई लिएर भएको सामान्य घरसायी विवादमा दयालुले हिजो बिहान ६ बजे ओछ्यानमा पुगेर वृद्ध बुवालाई ढुङ्गाले हानेका हुन् ।
छोराले प्रहार गरेको ढुङ्गाले लागेर वृद्ध बाबु गम्भीर घाइते बने । घाइते उनलाई सोही दिन उपचारका लागि विराटनगरस्थित कोसी अस्पताल ल्याइएको थियो । कोसीले उपचार सम्भव नहुने भन्दै भारतको सिलिगुडीलगायतका सुविधा सम्पन्न अस्पताल लग्नू भनेर रेफर गरिदिएको थियो ।
‘कोसीमा उपचार सम्भव नभएपछि रेफर गरिएको थियो’, डिएसपी मुकारुङले केटिएम दैनिकसँग भने, ‘आर्थिक अवस्था कमजोर भएका कारण आफन्तले सुविधासम्पन्न अस्पताल लान सकेनन् । घर लगेर राखेको भोलिपल्ट उनको मृत्यु भएको हो ।’ टिनतालको आइतबार (आज) बिहान साढे पाँच बजेतिर आफ्नै घरमा मृत्यु भएको डिएसपी मुकारुङले बताए ।
छोराले ढुङ्गाले हानेर बाबुको हत्या गरेको घटनाको इलाका प्रहरी कार्यालय रङ्गेलीले दयालुलाई नियन्त्रणमा लिइसकेको छ । रङ्गेली प्रहरीका प्रहरी निरीक्षक (इन्सपेक्टर) अनमोल खड्काका अनुसार उक्त विषयमा अनुसन्धान थालिएको छ ।
पक्राउ परेका उनीविरुद्ध कर्तव्य ज्यान मुद्दा चलाउन अदालतबाट म्याद थप गरेर घटनाको बाँकी अनुसन्धान अघि बढाइने प्रहरीले बताएको छ ।
नोट : यो समाचार प्रयोग गरिएको तस्विर प्रतिनिधि तस्विर हो । उक्त तस्विर बिना पिपिई पशुपति आर्यघाटमा शव जलाइरहेका एक युवाको हो । उनको बारेमा केटिएम दैनिकमा प्रकाशित भएको समाचार यो लिंकमा भेटिन्छ ।
