कोरोनाको दोस्रो लहरले मुलुक आक्रान्त बनेको छ । एक सातायाता सङ्क्रमणमुक्त हुनेको संख्या उल्लेख्य रुपमा बढेको भएतापनि कोरोनाबाट ज्यान गुमानेको संख्या बढिरहेको छ ।
राजधानीको पशुपति आर्यघाटमा शवको ताँती लाग्न थालेको दुई हप्ताभन्दा बढी भयो । विगत २ हप्तादेखि बाग्मती किनारामा कोरोना सङ्क्रमणबाट निधन भएकाहरुको शव जलाउन थालिएको छ । मङ्गलबार केटिएम दैनिकका फोटो पत्रकार पशुपति क्षेत्रमा १ घन्टा बिताउँदा पीपीई नलगाइकन कोरोना सङ्क्रमितको शव जलाउँदै गरेका एक युवा भेटिए ।
शव व्यवस्थापन कार्यविधि २०७६ का अनुसार कोभिड-१९ बाट मरेका ब्यक्तिका शवको संसर्गबाट रोग अर्को व्यक्तिमा सरेको प्रमाण हालसम्म फेला नपरे पनि शव सद्गगतको क्रममा अपनाउनु पर्ने कार्यविधि तय गरिएको छ। सद्गगत गर्नु पूर्व आफ्नो कूल परम्परा अनुसार शवलाइ नछोई कम्तीमा एक मिटर टाढावाट पालैपालो हेर्न दिन सकिने कार्यविधिमा उल्लेख छ। डव्लूएचओको निर्देशिकामा पनि शवलाई र छुन नपाउने र शव हेर्न कम्तीमा एक मिटरको दूरी कायम गर्ने व्यवस्था छ। शवलाई अस्पताल वा घरबाट अन्तिम संस्कारका लागि लैजाने क्रममा अस्पताल एम्बुलेन्सका कर्मचारी सद्गगत गर्ने व्यक्तिहरू मृतकका आफन्तजनले पञ्जा, चश्मा, टोपी मास्क सहितको पीपीई प्रयोग गर्नुपर्ने मापदण्ड तय गरिएको छ।
तर हाम्रो क्यामेरामा कैद भएका ती युवकले मुखमा एउटा सर्जिकल मास्क र हातमा निर्माणकार्यमा प्रयोग हुने पञ्जाबाहेक स्वास्थ्य मापदण्ड पालना गरेका थिएनन् ।
को हुन् ती युवक अनि किन आफ्नो स्वास्थ्यको ख्याल नगरी कोरोना सङ्क्रमितको शव जलाइरहेका छन् भन्ने हाम्रो मनभित्र उब्जेको प्रश्नको उत्तर हामीले पाउन सकेनौं । पशुपति आर्यघाटको वल्लोछेउबाट तस्विर लिइरहँदा हामीले पल्लो छेउमा कोरोना सङ्क्रमितको शवलाई बिना पीपीई लगाएर अन्तिम बिदाई गरिरहेका ती युवकसामू पुगेर उनको बारेमा थप जान्ने इच्छा पूरा गर्न सकेनौं ।