सुनसरी प्रशासनले कोरोना सङ्क्रमण रोकथामका लागि जारी गरेको निषेधाज्ञाका कारण मोरङको सुन्दरहरैँचा नगरपालिका–६ गछियाका किसान ऋषिकेश निरौलाले बेलुकाको दूध सङ्कलक केन्द्रमा पुर्याउन पाएका थिएनन् । सुनसरीको इटहरीमा सुरक्षा व्यवस्था कडाइ पारिएपछि पछिल्लो २२ दिनयता बेलुकाको दूध डेरी पुर्याउन नपाएपछि निरौलाले दोहोरो क्षति ब्यहोर्नुपरेको थियो ।
६२ वर्षीय निरौलाले पालेको ८ वटा गाईको बिहान–बेलुका गरेर कम्तीमा ६० लिटर दूध हुन्छ । तर कोरोनाकै कारण बेलकाको दूध बिक्री नहुँदा उनले नोक्सानी ब्यहोरिरहेका थिए । बेलुकाको दूध नबिकेपछि उनले केटिएम दैनिकसमक्ष दुखेसो पोखेका थिए । उनले मोटरसाइकलमार्फत बोकेर सात किलोमिटर पश्चिम इटहरीको सुनसरीस्थित इटहरी दूग्ध उत्पादक सहकारी संस्था पुर्याउँदा कोरोनाका कारण देखाउँदै प्रहरी प्रशासनले रोकेको भन्दै गुनासो गरेका थिए ।
सोही विषयमा केटिएम दैनिकले रिपोर्ट तयार पारेको थियो । सो रिपोर्टपछि प्रदेश १ का आन्तरिक मामिला तथा कानुन मन्त्री हिक्मतकुमार कार्कीले सुनसरीका प्रमुख जिल्ला अधिकारी उमेशकुमार ढकाललाई सहजीकरण गरिदिन आग्रह गरेका थिए । मन्त्रीको आदेशपछि ढकालले इलाका प्रहरी कार्यालय इटहरीमार्फत बेलुका पनि दूध सङ्ककन गर्न अनुमति दिएको इटहरी दुग्ध सहकारी संस्थाका अध्यक्ष उमेश वस्तीले जानकारी दिए ।
‘मन्त्रीज्यूले दुखेसो सुनेपछि सिडिओमार्फत आदेश दिनुभएको थियो’, उनले खुसी हुँदै केटिएम दैनिकलाई सुनाए, ‘आजबाट बेलुका पनि दूध सङ्कलन गर्न थाल्यौँ । यसबाट किसान हर्षित् देखिएका छन् । सुरक्षाकर्मीबाट आज त्यस्तो रोकटोक भएन ।’ यता, किसान निरौलाले केटिएम दैनिकलाई धन्यवाद दिँदै अब बिक्री नभएकै कारण दूध अरूलाई निःशुल्क बाँड्नुपर्ने बाध्यताको अन्त्य भएको सुनाए । यसअघि उनले महामारीका कारण गाउँ–घरमा दूध नबिकेको उल्लेख गर्दै गाउँघरमा निःशुल्क बाँड्दा पनि नलाने गरेको गुनासो गरेका थिए ।
‘एउटा समाचारका कारण हामीले राहत अनुभव गर्न पायौँ’, उनले खुसी व्यक्त गर्दै भने, ‘अब मैले गाउँघरमा दूध निःशुल्क बाँडेर दोहोरो क्षति ब्यहोर्नु पर्दैन । खुसी–खुसी बेलुकाको दूध पनि डेरी पुर्याउँछु । केटिएम दैनिकलाई हृदयदेखि नै धन्यवाद दिन चाहन्छु ।’
यसैगरी, प्रमुख जिल्ला अधिकारी ढकालले यसअघि निषेधाज्ञा जारी गर्दा आदेशमा दूध सङ्कलन गर्न पाइने उल्लेख भएको बताए । ‘हामीले जारी गरेको आदेशमै दूध सङ्कलन गर्न पाइने उल्लेख थियो । गलत बुझाइका कारण रोकटोक भएको हुनुपर्छ । मैले बेलुका पनि दूध सङ्कलन गर्न अनुमति दिएको छु । यस कार्यमा सुरक्षा निकायलाई सहजीकरण गर्न भनेको छु’, ढकालले भने ।
यस्तो थियो समाचार
दूध बिक्री नहुँदा नोक्सानी ब्यहोर्दै आएको किसानको दुखेसो: गाउँमा बाँड्छु भन्दा पनि खाइदिँदैनन्
