सुदूरपश्चिम प्रदेश सरकारले धनगढीमा ५० शय्याको आइसोलेसन भवन निर्माणलाई अगाडि बढाएको छ ।
प्रदेशको सामाजिक विकास मन्त्रालय मातहतको स्वास्थ्य कार्यालयल कैलालीले सञ्चालनमा रहेको सेती प्रादेशिक अस्पतालको कोभिड अस्थायी अस्पतालकै परिसरमा पुनःप्रदेश सरकारले ५० शय्याको आइसोलेसन भवन निर्माण कार्य अगाडि बढाएको हो।
असार मसान्तसम्म प्रि–फ्याब भवन निर्माणको समय अवधि राखिएको छ। हालसम्म ३५ प्रतिशत भौतिक प्रगति भइसकेकोले तोकिएको अवधि भन्दा पहिले नै निर्माणको काम पूरा हुने निर्माण व्यवसायीको दाबी छ। निर्माणको ठेक्का वाईआर कन्ट्रक्सन प्रालिले पाएको छ।
एक महिना नहुँदै ३५ प्रतिशत काम भएकाले सम्झौता अवधि भन्दा पहिले भवन निर्माणको काम पुरा गने सकिने निर्माण व्यवसायी रोहित रानाले बताए । उनले भने, ‘हामीलाई काम गर्न कुनै समस्या छैन्। निर्माण सामाग्री र कामदार छन्। अबको एक महिनाभित्र काम सक्छौ।’
एक करोड ४९ लाखको लागतमा स्वास्थ्य कार्यालय कैलालीले निर्माण थालिएको आइसोलेसन भवन सेती प्रादेशिक अस्पताललाई हस्तान्तरण गरिने छ । प्रादेशिक अस्पतालले आवश्यक शय्या, उपकरण, अक्सिजन सिलिन्डरलगायतका सामग्री खरिद गर्नुपर्ने छ।
त्यस्तै, स्वास्थ्य कार्यालय कैलालीका निमिक्त प्रमुख लालबहादुर धामीले काम द्रुत गतिमा भइरहेको बताए । ‘सेती प्रादेशिक अस्पतालका मेसु डाक्टर हेमराज पाण्डको समेत सुझाव अनुसार आइसोलेसन भवनको डिजाइन गरिएको छ । पहिलेको भन्दा राम्रो निर्माण गर्दैछौ । काम सकिएपछि सेतीलाई हस्तान्तरण गर्ने हो। सेतीले सङ्क्रमितलाई राख्छ’, उनले भने ।
