सुनसरी । सुनसरीमा जेठ १५ गतेसम्म लागू हुनेगरी पूर्ण निषेधाज्ञा थपिएको छ । जिल्ला प्रशासन कार्यालयले सुनसरीका प्रमुख जिल्ला अधिकारी उमेशकुमार ढकालका अनुसार बुधबार बसेको बैठकले निषेधाज्ञा थप्ने निर्णय गरेको हो ।
उनका अनुसार वैशाख ३१ गते मध्यराति १२ः०० बजेदेखि जेठ १५ गते मध्यराति १२ः०० बजेसम्मका लागि निषेधाज्ञा थपिएको हो । त्यस अवधिमा जिल्लामा औषधि पसल तथा अस्पतालबाहेक अन्य कुनै पनि व्यवसाय सञ्चालन गर्न नपाइने प्रजिअ ढकालले बताए ।
‘जोखिम कायमै रहेका कारण पुनः निषेधाज्ञा थपिएको हो’, प्रजिअ ढकालले केटिएम दैनिकसँग भने, ‘पछिल्ला केही दिनयता सङ्क्रमितको सङ्ख्या बढ्दै गइरहेको छ । यसअघि कडा निषेधाज्ञा जारी भएपनि अटेर गर्नेको सङ्ख्या उस्तै थियो । यसैले अत्यावश्यकबाहेक सबै व्यवसाय बन्द गर्ने निर्णय भएको हो ।’
वैशाख ३१ गतेसम्म जिल्लामा निषेधाज्ञा जारी गरिएकोमा सङ्क्रमणको दर हालसम्म उच्च रही मानवीय क्षतिसमेत भइरहेको अवस्थालाई मध्यनजर गर्दै जेठ १५ गतेसम्मका लागि अस्पतालबाहेकका अन्य व्यवसाय सञ्चालनमा रोक लगाइएको उनको भनाइ छ ।
जेठ १५ गतेसम्म अत्यावश्यकबाहेकका अन्य सबै सवारी साधनको सञ्चालनमा पूर्ण रूपमा बन्देज लगाइएको बताउँदै उनले मोटरसाइकल र सिटी सफारीसमेत सञ्चालन गर्न नपाइने बताए ।
अत्यावश्यक सवारी साधनहरू जस्तैः एम्बुलेन्स, दमकल, शव वाहन, खानेपानी, इन्धन, खाद्यान्न, तरकारी, फलफूल, दूध आदि बोक्ने सवारी विषय उल्लेख गरेर सञ्चालन गर्न सकिने व्यवस्था गरिएको छ ।
