कोरोनाभाइरस संक्रमण रोकथामका लागि काठमाडौं उपत्यकामा लगाइएको निषेधाज्ञा १५ दिनका लागि थप्ने तयारी गरिएको छ ।
काठमाडौं उपत्यकाका तीन जिल्लाका प्रमुख जिल्ला अधिकारीहरुको संयुक्त छलफलले थप १५ दिनका लागि निषेधाज्ञा थप्ने तयारी गरेको भक्तपुरका प्रमुख जिल्ला अधिकारी प्रेमप्रसाद भट्टराईले बताए । उनले निषेधाज्ञा थप्नेबारे मङ्गलवार (भोलि) बैठक बसेर औपचारिक निर्णय गर्ने जानकारी दिए ।
काठमाडौं उपत्यकामा पहिलो चरणमा गएको १६ देखि निषेधाज्ञा जारी गरिएको थियो । त्यसपछि फेरि लम्ब्याउँदै आउँदाे बुधवार (पर्सि) २९ गतेसम्मका लागि लम्ब्याइएकाे थियो ।
पछिल्लो समय कोरोनाभाइरसबाट संक्रमित हुनेको संख्या ह्वात्तै बढेपछि संक्रमण नियन्त्रणका लागि निषेधाज्ञा थप लम्ब्याइएको बताइएको छ । तर निषेधाज्ञा थपिए पनि कोरोना सङ्क्रमितको संख्या घटेको छैन । मन्त्रिपरिषद्ले धेरै सङ्क्रमित भएको जिल्लाका प्रमुख जिल्ला अधिकारीहरूलाई अवस्था हेरेर निषेधाज्ञा र प्रतिबन्ध लगाउने अधिकार दिएको छ ।
