यात्रुहरुलाई आवत-जावतमा सहज बनाउन र सम्भावित दुर्घटनाबाट जोगाउन बनाइएका उपत्यकाका सडक पेटी अत्यन्त अस्तव्यस्त र अतिक्रमित देखिन्छन् ।
सडक पेटी यात्रुहरुको आवतजावतमा भन्दा पनि ब्यापारीहरुको ब्यापार गर्ने र सामान राख्ने थलो बन्न पुगेको छ । थोरै जमिनमा तयार गरिने घर संरचना र ती निर्माणको क्रममा प्रयोग भएका र प्रयोग पछि बाँकि सामान राख्ने थलो बनेका छन् यहाँका सडकपेटी, जसले गर्दा यात्रुहरु बाध्य भएर सडकमा हिंड्दा बढी दुर्घटना समेत निम्तिने गरेको छ ।
विशेषगरी कपडा ब्यवसायी, स-साना होटल ब्यवसायी, अटो पार्टस्, फलफूल लगायतका ब्यापारीहरुले पसलका अतिरिक्त सामानहरु बाहिर फिँजाउने र यी ब्यवसायमा ग्राहक बनेर आउनेहरु फूटपाथमै बसेर गफिँदा यात्रुहरुलाई बाटो हिंड्न असुविधा हुने गरेको छ । साथै फुटपाथ व्यापारीहरुको अतिक्रमणमा समेत सडक पेटी परेको छ ।
पछिल्लो समयमा काठमाडौंका सडकपेटीमा रुखविरुवा रोप्दा ती रुख विरुवा जगेर्ना गर्नको लागि राखिएका फलामे जालीहरुले बाटोमात्र ओगटेका छन् ।
काठमाडौंका डिल्लीबजार नक्शाल क्षेत्रमा सडकपेटीनै ढाक्ने गरी बोटबिरुवा जोगाउनको लागि राखिएका फलामे जालीहरुले गर्दा पैदलयात्रुहरु सडकबाट नै हिड्न बाध्य भएका छन् । केही स्थानीयहरु भने सडकपेटीमा रुख रोप्ने काम राम्रो भएपछि तल सिमेन्टको ढलान भएको ठाउँमा विरुवाहरु हुर्कन नसक्ने बताउँछन् ।
हामीसँगको कुराकानीमा केही पैदलयात्रीहरुले भने “गाडीवालाहरुलाई मात्र रहेछ यो बाटो त । हामी सर्वसाधरण पैदलयात्रुको लागि अपाङ्ग अशक्तहरुको लागि त यहाँ हिड्ने बाटो नै छैन ।”
हेरौं भिडिओ
तस्विरहरु
