साथिमार्टले २ सय भन्दा बढी खाद्यान्न तथा कस्मेटिक बस्तु उत्पादन गर्ने भएको छ ।
पछिल्लो समयमा आक्रामक रूपमा बजार बिस्तारमा लागेको साथीमार्टले नेपाली गुणस्तरीय वस्तुहरू प्रवर्द्धन गर्ने उद्देश्यले किसान तथा स्थानीय उत्पादकहरूसँग सहकार्य गरेर उक्त सामानहरु उत्पादन गर्न लागेको हो ।
कम्पनीले दाल, चामल, घ्यु, गुन्द्धक, सिस्नो धुलो, मसला, चिया, कफी, अचार, तेल, पिठो, मस्यौरा जस्ता २०० भन्दा बढी खाद्य वस्तुहरू तथा स्याम्पु, साबुन, टुथपेस्ट, सरफ, हेन्डवास, क्रिम, सनलोसन, फेस वास लगायत २५ भन्दा बढी उत्पादनहरू आफ्नै ब्रान्डमा उत्पादन गरी देश तथा विदेशमा पठाउने तयारी गरिरहेको छ।
आगामी वैशाख महिनाबाट नेपालभरि रहेका ७० भन्दा बढी आउटलेटमा साथीमार्टका नयाँ उत्पादनहरू ग्राहकले पाउनेछन् । ती वस्तुहरूमा २० प्रतिशतसम्म छुट दिइने साथीमार्टका सि.ई.ओ. सागर पोखरेलले केटिएम दैनिकलाई बताए ।
यी उत्पादनबाट धेरै किसानले रोजगारी पाउने तथा नेपाली उत्पादन पनि अन्तर्राष्ट्रिय बस्तुभन्दा राम्रो हुन्छन् भन्ने सन्देश जाने साथीमार्टले जनाएको छ ।
साथी मार्ट ग्रुप अन्तरगतकै कम्पनी साथी प्रोडक्सन इन्डस्ट्री प्रा.लि. तथा साथीमार्टले ती वस्तुहरूको उत्पादन गर्ने कम्पनीले जनाएको छ ।
निकट भविष्यमै उक्त उत्पादनहरू अस्ट्रेलिया, रसिया, चाइना लगायतमा देशहरूमा समेत निर्यात गर्ने तयारी कम्पनीले गरेको छ । विगत ५ वर्ष देखि विभिन्न उत्पादनहरू विदेशमा निर्यात गर्दै आएको पोखरेलले बताए ।