नेपाली कांग्रेसका केन्द्रीय सदस्य एवम् पूर्वमन्त्री मोहनबहादुर बस्नेतले कांग्रेसले बनाएको संविधान धरापमा नपार्न नेकपालाई चेतावनी दिएका छन् ।
कांग्रेसको भ्रातृ संस्था नेपाल लोकतान्त्रिक संघले सोमबार काठमाडौंको कोटेश्वरमा आयोजना गरेको रक्तदान र खेलाडी तथा कलाकार सम्मान कार्यक्रमलाई सम्बोधन गर्दै उनले भने, ‘कांग्रेसका सभापति सुशील कोइरालाको नेतृत्वमा सरकार बनेपछि मात्र संविधान बनाउन सफल भएको स्मरण गराउँदै संविधानमाथी कु नगर्न आग्रह गरेका हुन् ।
‘पहिलो संविधानसभामा चार वटा कम्युनिस्टका प्रधानमन्त्रीले संविधान दिन सकेनन् । दोस्रो संविधानसभामा नेपाली कांग्रेसको ठूलो पार्टी बनेर चुनाव जित्यो’, खेलकुद विभागका प्रमुख समेत रहेका बस्नेतले बताए ।
‘नेपाली जनताको रगत पसिना बगाएर, नेपाली जनताकै छोराछोरीलाई संविधान सभामा पुर्याएर उनीहरूले नै निर्माण गरेको संविधानले यो देशमा राज्यसत्ता सञ्चालन गरोस् भन्ने हिसाबले सात दशकदेखि कुरेर बसेको संविधान हो’, उनले भनेका छन् ।
कांग्रेसको नेतृत्वमा बनेको संविधान रक्षाका लागि कांग्रेस तयारी अवस्थामा रहेको पनि उनले बताए । संविधानलाई रक्षा गर्न कांग्रेस चुनावका लागि तयारी अवस्थामा रहेको उनको भनाई छ ।
उनले चेतावनी शैलीमा भनेका छन्, ‘त्यो संविधानलाई यो वा त्यो बहानामा धरापमा पारेको छ । प्रतिनिधिसभा भङ्ग गरेको छ । प्रतिनिधिसभा भङ्ग गर्ने काम असंवैधानिक हो । अप्रजातान्त्रिक हो । यसले अराजक गतिविधि निम्ताउन सक्ने अवस्था छ ।’
‘नेपाली कांग्रेस संवैधानिक सर्वोच्चतामा विश्वास गर्ने पार्टी, कानूनी राज्यमा विश्वास गर्ने पार्टी हो’, उनले भने, ‘यो मुद्धा सर्वोच्च अदालतमा पुगिसकेको हुनाले हामी सर्वोच्च अदालतले जे फैसला गर्छ त्यसको पक्षमा व्यवहारमा लागू गर्न चाहन्छौँ ।’
पूर्वमन्त्री बस्नेतले भने, ‘सर्वोच्च अदालतले चुनाव गराउँछ भने पनि नेपाली कांग्रेस जहिले पनि जनताको मतमा विश्वास गर्ने, ब्यालेट बक्समा विश्वास गर्ने पार्टी भएको हुनाले जतिखेर पनि चुनाव हुन्छ भने, चौवीसै घण्टा कांग्रेस तयार भएर बसेको पार्टी हो । हामी चुनावमा जान्छौँ ।’
‘सर्वोच्च अदालतले प्रतिनिधि सभा पुनःस्थापना गर्छ भने हामी त्यो कुरालाई पनि स्वीकार गर्छौं’, उनले भने, ‘सर्वोच्च अदालतले प्रतिनिधि सभा पुनःबहाली पनि नगर्ने, चुनावमा जाने अवस्था पनि सिर्जना नगरेर गोलमालको अवस्था सिर्जना गर्यो भने नेपाली कांग्रेस आन्दोलनमा जानुपर्ने अवस्था हुन सक्छ । त्यस बेला युवाहरूले अग्रपंक्तिमा लड्नुपर्छ ।’
‘हिजोका दिनमा सञ्चारमाध्यमलाई समाप्त पार्ने गरि, प्रजातन्त्रको कुरा समाप्त पार्ने गरि विधेयक ल्याएर आएको होइन ? त्यो विधेयक ल्याउने बेलामा प्रचण्ड र माधव नेपालजीले अघिल्लो पटक स्वीकार गरेको अवस्था छ’, बस्नेतले भने, ‘यस्ता विधेयकमा प्रचण्ड–माधवले समर्थन जनाउने काम भएको छ ।’