प्रधानमन्त्री केपी शर्मा ओली सोमबार सिंहदरबारमा प्रवेश गर्दै हुनुहुन्छ । गत साल चैत २ गतेपछि बालुवाटारबाट सिंहदरबारस्थित आफ्नो कार्यालयमा कामका लागि पुगेका छैनन् । ११ महिनापछि फागुन ३ गते सोमबार सिंहदरबारको आफ्नो कार्यालयमा भित्रिने शुभ साइत जुरेको छ । प्रधानमन्त्री ओली सिंहदरबारको मूल भवनस्थित हालसालै तयार भएको भव्य कार्यालयमा सोमबार जुरेको शुभ समयमा प्रवेश गर्नेछन् ।
२०७२ वैशाख १२ गते गएको भूकम्पले क्षतिग्रस्त भएको सिंहदरबारको मूल भवनको चार मोहडामध्ये उत्तर,पूर्व तथा दक्षिण मोहडाको पुनर्निर्माण कार्य सम्पन्न भएको हो । महत्त्वपूर्ण मोहडाका रूपमा रहेको पश्चिमी मोहडाको निर्माण कार्य चलिरहेको उल्लेख गरिएको छ । गत बिहीबार प्रधानमन्त्री आफै सिंहदरबार पुगेर फागुन २ गतेभित्र सम्पूर्ण काम पुरा गर्न पुनर्निर्माण प्राधिकरणका सिइओ सुशील ज्ञवालीलाई निर्देशन दिएका थिए ।
नयाँ भवनमा प्रवेश गरे लगत्तै प्रधानमन्त्रीलाई उक्त भवनको वास्तुले कत्तिको सहयोग गर्दा ? सिंहदरबारस्थित आफ्नै कार्यालयबाट गरिएका निर्णय कत्तिको फलदायी रहला ? बालुवाटारबाट गरिएका निर्णयले बारम्बार विवाद मात्रै निम्त्याएको भन्दै वास्तुविद्को सल्लाहमा आगामी कार्यक्रम सिंहदरबारबाटै गर्न लागिएको हो । केही दिनअघि प्रधानमन्त्री निवास बालुवाटारको वास्तु निलेको समाचार प्रकाशित भएपछि सर्वत्र चासो बढेको थियो ।
बालुवाटारबाट गरिएका निर्णयहरू विवादास्पद भएको भन्दै वास्तु मिलाएर बनाइएको सिंहदरबारमा सोमबार सर्दै ।
वास्तु शास्त्रको नियम पालना गर्दै निर्माण भएको नवनिर्मित भवनमा प्रवेश गरे लगत्तै प्रधानमन्त्रीलाई झन् शक्तिशाली भूमिकामा उभ्याउनेछ । सोमबार प्रवेश कालागि शुभ साइत जुरेको प्रमुख तीन मोहडा वास्तुका हिसाबले अत्यन्तै शुभ रहेको छ ।
अहिले निर्माण सम्पन्न भएका उत्तरी मोहडा,पूर्वी मोहडा र दक्षिणी मोहडा तीन वटै मोहडा उत्तिकै शक्तिशाली छन् । प्रधानमन्त्रीले विगतका समयमा बालुवाटारबाट गरिएका सबै निर्णयहरू विवादास्पद हुने गरेकोमा आगामी निर्णयहरुले सोचेअनुसार नै कार्य गर्ने ज्योतिषी रिजालको दाबी छ । माघ शुक्ल पक्षको सोमबार नक्षत्र उत्तरभाद्रपदा र मीन राशिका चन्द्रमा उत्तर दिशामा रहने हुनाले शुभ मानिएको छ । तिथिका हिसाबले चतुर्थी तिथि रिक्तता तिथि भएकाले यो अशुभ नै हो । चारगते श्री पञ्चमी पर्व परेकाले दोष नलाग्ने उल्लेख गरिएको छ ।
लेखक रिजाल ज्योतिष तथा वास्तुविद् हुन उनी दक्षिण एसियाली ज्योतिष महासङ्घ नेपालका महासचिव हुन । सम्पर्क ९५१०६११२४
