वर्षौदेखि पशुपतिमा शव व्यवस्थापनको सेवामा लागेर चर्चामा आएका विनयजंग बस्नेत र पत्रकारबीच शनिबार राजधानीको सिलौटो रेष्टुरेन्टमा कडा विवाद भयो ।
आफूले विवाह गर्न लागेको प्रेमिका पूजा विश्वकर्मासहित इन्टरभ्यू दिन आएका विनयले मदिरा पिएर आएको चाल पाएपछि महिला पत्रकार सुरक्षा भट्टराईले उनीमाथि प्रश्न गरेकी थिइन् ।
उनको प्रश्न सुनेर विनयजंग जंगिए । उल्टै महिला पत्रकारमाथि जाइलागे । त्यसपछि के–के भयो ?
हेर्नुस्, हाम्रोकला टिभीले कैद गरेको एक्सक्लुसिभ भिडियो
दाहसंस्कारमा कसरी लागे बस्नेत
उनी दाहसंस्कारमा लाग्नुको पनि उस्तै कहानी छ। १५ वर्षअघि बुवाको सवारी दुर्घटनामा परेर ज्यान गयो। सहसचिवबाट अवकाश पाएका बुवा खोज्दै जाँदा १६ वर्षअघि जब विनयजंग बस्नेत शिक्षण अस्पतालको बेवारिसे शव कक्ष पुगे। त्यतिखेर बेवारिसे शवहरू किरा परेको अवस्थामा देखेपछि उनको मन फेरियो।
‘बुवा सवारी दुर्घटनामा परी मृत्यु भएको रहेछ। बुवा खोज्दै शिक्षण अस्पताल पुग्दा अन्य शव किरा परेको अवस्थामा देखें,’ विगत सम्झँदै उनले भने, ‘मृत्युपछि दाहसंस्कार त हुनुपर्छ भनेर व्यवस्थापनमा लाग्नुपर्छ भन्ने महसुस गरें।’
अहिले शव व्यवस्थापन मात्र होइन उनले सडकमा बेवारिसे भएका व्यक्तिलाई राख्नका लागि आश्रम खोल्ने तयारी गरेका छन्। यसका लागि उनले ललितपुरमा रहेको चार रोपनी जग्गा बेचेका छन्। बैंकबाट पनि ११ लाख रुपैयाँ ऋण लिएको उनले सुनाए।
काठमाडौंका दुइटा स्थानमा सुधारगृह खोलेका छन्। जाँडरक्सी खानेहरूका लागि ललितपुरको ‘लामाटार’ र ‘भैंसेपाटी’ मा रिहाब सेन्टर खोलेका छन् उनले। जहाँ रक्सीको छुटकारा पाउन उपायहरू सिकाउने गर्छन्।
अहिले उनलाई साथ दिन म्याग्दीकी सपना रोकामगर पनि पुगेकी छन्। तीन महिनादेखि उनीसँगै शव व्यवस्थापनमा खटिएकी १८ वर्षीय रोकामगरले आफैं शव बाँध्नेदेखि जलाउने काम गर्छिन्। यसको श्रेय बस्नेतलाई नै दिन्छिन् उनी।