चन्दननाथ नगरपालिका वडा नं.१ तलिचौर दानसाघुँ जुम्ला स्थित तिला र जुवा नदीको दोभानमा बनेको पक्की पुलको उद्घाटन गरिएको छ ।
साबिकको कर्णाली अञ्चल पहिलो पटक जुम्लाको दानसाँगुमा शिलान्यास भएको पक्की पुलको निर्माण कार्य सम्पन्न भई आज कर्णाली प्रदेशका आन्तरिक मामिला तथा कानूनमन्त्री नरेश भण्डारी, प्रमुख जिल्ला अधिकारी भूपेन्द्र थापा लगायतको टोलीले सो पुलको उद्घाटन गरेको हो ।
कोरोना संक्रमित भएका जुम्लाका प्रमुख जिल्ला अधिकारी भूपेन्द्र थापा कोरोना संक्रमणमुक्त भएर अहिले सार्वजनिक कार्यक्रमहरुमा देखिन थालेका छन् ।
कोरोना भाइरसको संक्रमण र अन्य विविध कारणले गर्दा यो पुल तोकिएको समय भन्दा केही पछि मात्र सम्पन्न भएको हो ।
पुलको निर्माण पश्चात् अब जुम्ला – डोल्पाको आवागमन सहज हुने भएको छ ।
यो पुल सञ्चालन आएपछि जिल्लाको गोठीचौर गाउँपालिका कर्णाली राजमार्गसँग जोडिएको छ। जुम्लाको दानसाघुँमा पर्ने यो पुल डोल्पालाई समेत जोड्ने भएको हुनाले यो पुल बनेपछि डोल्पालीहरु पनि खुसी भएका छन्। पुल निर्माण भएपछि जुम्ला देखी डोल्पासम्म सामान ढुवानी गर्न सहज हुने भएको छ।