झापा । प्रदेश सरकारले दिएको कोरोना परीक्षण गर्ने पीसीआर मेसिन मेची अञ्चल अस्पतालमा आइपुगेको छ । मेसिन आज विहान ९ बजेदेखि जडान कार्य सुरु हुने भएको छ ।
मुख्यमन्त्री शेरधन राई, सामाजिक विकास मन्त्री जीवन घिमिरे र सामाजिक विकास राज्यमन्त्री जसमाया गजमेरले झापाका प्रदेश सांसदहरुलाई शुक्रवार विराटनगरमा सो मेसिन हस्तान्तरण गरेका थिए ।
मेसिन भद्रपुरमा आइपुगेको र आज विहान सांसदहरुसँगको भेटघाटपछि जडान कार्य प्रारम्भ गरिने अस्पताल स्रोतले जनाएको छ । मेसिनले दैनिक ९० जनाको कोरोना जाँच्न सक्ने बताइएको छ ।
पीसीआर मेसिनलाई मेची अञ्चल अस्पतालभित्र प्रयोगशालामा राखिने जिल्ला समन्वय समिति झापाका प्रमुख सोम पोर्तेलले जनाएका छन् । सो मेसिन स्वीस सरकारले प्रदेश सरकारलाई दिएको हो ।
अर्को मेसिन कनकाईमा
झापामा कोरोना परीक्षण गर्ने पीसीआर मेसिन अब दुई वटा भएका छन् ।
‘एकका लागि एक अभियान’ले जनस्तरमा चन्दा सङ्कलन गरेर खरिद गरेको अर्को मेसिन कनकाईको समर्पण भवनमा जडान कार्य सम्पन्न भइसकेको छ । ‘एकका लागि एक अभियान’ झापामा जनस्तरबाट पीसीआर ल्याव स्थापनाका लागि नेतृत्व गर्ने समुदायबाट स्वस्फुर्त गठित संस्था हो । करीव एक करोड २० लाख रुपैयाँ चन्दा सङ्कलन गर्दै अभियानले अत्याधुनिक पीसीआर मेसिन खरिद गरेर कनकाईको समर्पण भवनमा जडान गरिसकेको छ ।
अभियानका संयोजक महेन्द्र गिरीले जनस्तरबाट सहयोग जुटाएर स्थापना गरिएको यो पीसीआर मेसिन प्रदेश सरकारलाई नै हस्तान्तरण गरिने र मेची अञ्चल अस्पताल मातहत सञ्चालनका लागि हस्तान्तरण गरिने बताएका छन् । मेसिनको परीक्षण चरणमा आइपुगेपछि सङ्घीय सरकारले सुरुङ्गामा ल्याव सञ्चालन गर्न नदिने हल्ला चलाइएपछि अभियानका संयोजक गिरीले ल्याव सरकारले नै सञ्चालन गर्ने र अबको केही दिनमा सरकारलाई हस्तान्तरण गरिने स्पष्ट बताएका हुन् ।