आफूलाई युवा ज्योतिषी बताउने अर्जुन क्षेत्री पक्राउ परेका छन्।
उनलाई बिहीबार राति अख्तियार दुरूपयोग अनुसन्धान आयोग टंगालको टोलीले पक्राउ गरेको हो।
क्षेत्रीले ‘अख्तियारको सहसचिव हुँ’ भन्दै ठगी गरेको आरोपमा उनलाई नियन्त्रणमा लिएको स्रोतले बताएको छ। तर अख्तियारका प्रवक्ताले प्रदीपकुमार कोइरालाले भने अहिले जानकारी आइनसकेको बताएका छन्।
एक प्रहरी अधिकृतका अनुसार उनले विद्युत् प्राधिकरणले खरिद गरेका जग्गामा घोटाला भएको भन्दै चार करोड रुपयाँ माग गरेका थिए । बार्गेनिङ क्रममा ५० लाखमा लेनदेन सहमति भइसकेपछिको अवस्थामा क्षेत्री पक्राउ परेका हुन् ।
उनलाई महानगरीय अपराध महाशाखा र अख्तियारको टोलीले पक्राउ गरेको हो।यसबारेमा विस्तृत विवरण आउन बाँकी छ। यसअघि पनि उनी भूकम्प आउँछ भन्ने अफवाह फैलाएपछि पक्राउ परेका थिए।
को हुन् अर्जुन क्षेत्री
पछिल्लो समय नेपालमा युवा ज्योतिषीको नामले चर्चा बटुल्न सफल ज्योतिषी हुन् अर्जुन कुमार थापा अर्थात ज्यो. अर्जुन क्षेत्री भोजपुर स्थायी घर भएका ज्योतिषी क्षेत्री करिब १२ बर्षको उमेरदेखि ज्योतिषी पेशामा सक्रिय रहेका छन् ।
उनले भारतको वाराणसीमा रहेको संस्कृत पाठशालाबाट ज्योतिष विद्यापिठमा स्नातक गरेका छन् । अनुहार हेरेर भविष्यबाणी, हस्तरेखा अध्ययन, खुट्टाको रेखाको अध्ययन, जन्मकुण्डली हेर्ने, चिना हेर्ने, अक्षर हेरेर भबिष्यबाणी, जोखाना हेर्ने रचामलबाट भविष्यबाणी आदी उनले गर्ने गर्दछन् । साथै क्षेत्रीका अनुसार सहि समयमा आफ्नो भाग्यको बारेमा अध्ययन गरे ४५ दिन भित्र भाग्य बदल्न सकिने उनको दाबी रहेको छ ।
