नेपालमा कोरोना संक्रमितको संख्या भुसको आगो झै सल्किरहेको भएता पनि कोरोनामुक्त हुनेहरुको संख्या पनि बढीरहेको छ ।
यसैबिच नेपाली सेनाका एक उच्च अधिकारीसहित दुई जना कोरोनामुक्त भएका छन्।
नेपाली सेनाका प्रवक्ता सहायक रथी विज्ञानदेव पाण्डेका अनुसार मध्यपूर्वी पृतना रौतहटमा कार्यरत दुबै जना कोरोनाबाट निको भएका हुन् ।
गत जेठ ३ गते मध्यपूर्वी पृतनाका एक उच्च सैनिक अधिकारीसहित दुई जनामा संक्रमण पुष्टि भएपछि उनीहरूको काठमाडौंस्थित सशस्त्र प्रहरीको अस्पतालमा उपचार गरिएको थियो।
पृतनका उच्च अधिकारीसहित दुई जनामा संक्रमण देखिएपछि उनीहरूसँगको सम्पर्कमा आएका व्यक्तिहरूको समेत परीक्षण गरिएको नेपाली सेनाका प्रवक्ता सहायक रथी पाण्डेले बताए ।
यो सँगै नेपालमा कोरोना संक्रमण भएर उपचाररत थप ८ जना संक्रमित निको भएर घर फर्किएका छन्।
दाङको बेलझुण्डी कोरोना विशेष अस्पतालमा उपचाररत ८ जना शुक्रबार कोरोना संक्रमणमुक्त भएर घर फर्किएका हुन्।
योसँगै नेपालमा निको हुने संख्या १ सय ९५ पुगेको छ। हालसम्म नेपालमा १ हजार ४२ जनामा कोरोना संक्रमण पुष्टि भएको छ भने ५ जनाको निधन पनि कोरोनाका कारण नै भएको पुष्टि स्वास्थ्य तथा जनसंख्या मन्त्रालयले गरेको छ।
