काठमाडौं। नेकपा एमालेका महासचिव शंकर पोखरेलले पछिल्लो निर्वाचनमा पार्टीले व्यहोरेको हारलाई अकल्पनीय भन्दै वैचारिक, राजनीतिक र सङ्गठनात्मक पुनर्गठन आवश्यक रहेको बताएका छन्।
बुधबार काठमाडौंमा प्रवासी नेपाली मञ्च, अन्तर्राष्ट्रिय कमिटीको दोस्रो अधिवेशन उद्घाटन समारोहलाई सम्बोधन गर्दै उनले फागुन २१ गते सम्पन्न निर्वाचनको परिणाम अपेक्षाअनुसार आउन नसकेको स्वीकार गरे। विगतमा पार्टीले गरेका राम्रा कामका आधारमा जनमत पुनः प्राप्त गर्न सकिने अपेक्षा गरिए पनि प्रत्यक्ष निर्वाचनतर्फ नौ सिटमा सीमित हुनुलाई उनले गम्भीर राजनीतिक धक्काका रूपमा व्याख्या गरे।
पोखरेलले भदौ २३ र २४ गतेका घटनापछि एमालेको राजनीतिक जीवनमा ठूलो धक्का लागेको उल्लेख गर्दै त्यसले पार्टीको भविष्यबारे गम्भीर प्रश्न खडा गरेको बताए। उक्त घटनापछिको राजनीतिक अवस्थालाई पार्टीले प्रतिगमनतर्फ उन्मुख भएको विश्लेषण गर्दै भू–राजनीतिक षड्यन्त्रको सामना गर्ने योजनासहित अघि बढेको उनको भनाइ थियो।
उनले निर्वाचन परिणामपछि पार्टीले समीक्षा प्रक्रिया अघि बढाएको जानकारी दिए। निर्वाचन परिचालन कमिटीले कार्यकर्ताबाट सुझाव सङ्कलन गरी प्रतिवेदन तयार गरेको र त्यसकै आधारमा पार्टी पुनर्गठनसम्बन्धी कार्यदल गठन गरिएको उनले बताए। कार्यदलले प्राप्त सुझावका आधारमा ४० बुँदे सङ्कल्प प्रस्ताव तयार गरेको थियो।
केन्द्रीय कमिटीको तेस्रो बैठकले पार्टीका समस्या पहिचान गर्दै आगामी कार्यदिशाका रूपमा दुई कार्यभार र १५ कार्ययोजना अघि सारेको उनले जानकारी दिए। विगतका कमजोरीको वस्तुनिष्ठ समीक्षा गरी पार्टीलाई वैचारिक, राजनीतिक र सङ्गठनात्मक रूपमा एकताबद्ध बनाउनुपर्नेमा उनले जोड दिए।
यसअघि संविधानसभाबाट संविधान जारी भएपछि केपी शर्मा ओलीको नेतृत्वमा बनेको नौमहिने सरकारले नाकाबन्दीको सामना गर्दै जनतामा आशा र विश्वास जगाएको पोखरेलले दाबी गरे। उक्त सरकारका कामले वामपन्थी जनमत विस्तारमा महत्त्वपूर्ण भूमिका खेले पनि त्यसपछिका सरकारहरूले अपेक्षित रूपमा जनमत विस्तार गर्न नसकेको उनको टिप्पणी थियो।
२०७४ सालमा गठन भएको शक्तिशाली सरकारले समेत वामपन्थी जनमत विस्तार गर्न नसक्नुको कारण खोज्नुपर्ने उल्लेख गर्दै उनले विगतका राजनीतिक तथा शासकीय अनुभवको समीक्षा गरेर मात्रै समाजवाद निर्माणको लक्ष्य हासिल गर्न सकिने बताए।
