रूपन्देही – सिद्धार्थनगर नगरपालिका–१ शान्तिगेटस्थित सीमा जाँचकक्षबाट सशस्त्र प्रहरीले रु दुई करोड ५१ लाखभन्दा बढी मूल्यका सुनका गरगहना बरामद गरेको छ।
सशस्त्र प्रहरी बल, नेपाल सीमा सुरक्षा गुल्म डण्डा, रुपन्देहीबाट खटिएको टोलीले विशेष सूचनाका आधारमा काठमाडौँ महानगरपालिका–१९ की ४६ वर्षीया इला पटेललाई जाँच गर्ने क्रममा उक्त गरगहना बरामद गरेको हो।
सशस्त्र प्रहरी नायब उपरीक्षक गोपीकृष्ण भट्टराईको कमाण्डमा खटिएको नेपाल प्रहरी र सशस्त्र प्रहरीको संयुक्त टोलीले भारतबाट नेपालतर्फ आउँदै गरेकी पटेललाई शङ्कास्पद अवस्थामा जाँच गर्दा विभिन्न डिजाइनका गरगहना फेला पारेको जनाएको छ।
उनको साथबाट हार, औँठी, चुरा, माला, सिक्री, झुम्का, गोली औँठी, लकेट, पोते, बाली, जुली, टप, नाकको फूली, पत्थरवाला हार र ब्रासलेटलगायतका गरगहना बरामद गरिएको हो।
बरामद गरगहनाको कुल तौल दुई किलो ६०५ ग्राम रहेको छ। धातुको मात्रा यकिन गर्न गरगहना सिद्धार्थनगर सुनचाँदी व्यवसायी सङ्घमा परीक्षणका लागि पठाइएको थियो। परीक्षणका क्रममा त्यसमा करिब एक किलो सुन रहेको पुष्टि भएको प्रहरीले जनाएको छ।
प्रहरीका अनुसार बरामद गरगहनाको भित्री भागमा अन्य धातु प्रयोग गरिएको र बाहिरी भागमा सुनको लेपन गरिएको पाइएको छ।
सशस्त्र प्रहरी नायब उपरीक्षक भट्टराईका अनुसार प्रचलित बजार मूल्यका आधारमा बरामद सुनको मूल्य रु दुई करोड ५१ लाख ९३ हजार ३५० कायम गरिएको छ।
बरामद गरगहना र नियन्त्रणमा लिइएकी पटेललाई आवश्यक अनुसन्धान तथा कारबाहीका लागि भैरहवा भन्सार कार्यालय, रुपन्देहीमा बुझाइएको छ। भैरहवा भन्सार कार्यालयका प्रमुख भन्सार अधिकृत हरिहर पौडेलले घटनासम्बन्धी आवश्यक प्रक्रिया अघि बढाइएको जानकारी दिए।
