काठमाडौँ । सार्वजनिक खरिद अनुगमन कार्यालयले विभिन्न पाँच निर्माण व्यवसायी तथा आपूर्तिकर्तालाई कालोसूचीमा राखेको छ।
कार्यालयले शुक्रबार सार्वजनिक सूचना जारी गर्दै सम्बन्धित निकायबाट प्राप्त पत्रका आधारमा सार्वजनिक खरिद ऐन, २०६३ को दफा ६३ को उपदफा (१) बमोजिम पाँच व्यवसायी तथा आपूर्तिकर्तालाई कालोसूचीमा राखिएको जनाएको हो।
कार्यालयका अनुसार कालोसूचीमा राख्ने निर्णय सूचना प्रकाशित भएको मितिदेखि नै लागू हुनेछ। कालोसूचीमा परेका व्यवसायी तथा आपूर्तिकर्ताले तोकिएको अवधिसम्म सार्वजनिक निकायबाट सञ्चालन हुने कुनै पनि खरिद प्रक्रियामा सहभागी हुन पाउने छैनन्।
सार्वजनिक खरिद अनुगमन कार्यालयले कालोसूचीमा रहेका व्यवसायी तथा आपूर्तिकर्तालाई निर्धारित अवधिमा सार्वजनिक खरिद प्रक्रियामा सहभागी नहुनसमेत सूचित गरेको छ।
